Հայրենական Մեծ պատերազմի վետերանների դրամական աւանդները
կփոխհատուցվեն արտահերթ
08-04-2010 18:54:00 | Հայաստան | Հասարակութիւն
ԵՐԵՎԱՆ, 8 ԱՊՐԻԼԻ, ՆՈՅԵԱՆ ՏԱՊԱՆ: Ապրիլի 8-ի երեկոյեան նիստում
Հայաստանի Ազգային Ժողովը 69 «կողմ» եւ 9 «ձեռնպահ» ձայներով
երկրորդ ընթերցմամբ եւ ամբողջութեամբ ընդունեց «ՀՀ 2010 թ.-ի
պետական բիւջէի մասին» օրէնքում լրացում կատարելու մասին
օրինագիծը: Ըստ այդմ, Հայրենական Մեծ պատերազմում տարած յաղթանակի
65-րդ տարեդարձի առիթով նախկին ԽՍՀՄ Խնայբանկում մինչեւ 1993թ.-ի
յունիսի 10-ը ներդրուած աւանդների դիմաց փոխհատուցումը պատերազմի
վետերաններին կտրամադրուի արտահերթ:
Հիմնական զեկուցող, ՀՀ ֆինանսների նախարար Տիգրան Դավթեանը
յայտնեց, որ կառավարութիւնն աննպատակայարմար է համարել պետական
բիւջէում այդ նպատակով լրացուցիչ գումարներ նախատեսելը: Այդ
առաջարկութեամբ հանդէս եկած «ՀՅԴ» խմբակցութեան անդամները
քուէարկեցին «ձեռնպահ», իսկ «Ժառանգութիւնը» քուէարկութեանը
չմասնակցեց: Վերջինի ղեկավար Ստյոպա Սաֆարեանը մինչեւ
քվեարկությունը յայտարարեց, որ վետերաններին աւանդների արտահերթ
փոխհատուցելու «գաղափարն ինքնին ընդունելի, ողջունելի է, սակայն
լուծումները` ոչ»:
Ընդդիմադիր պատգամաւորների հիմնական առարկութիւնը վերաբերում
էր նրան, որ լրացուցիչ միջոցներ չնախատեսելու դէպքում որոշակի
հակադրութիւն է ստեղծուելու վետերանների եւ նպաստառուների միջեւ,
քանի որ վետերանների աւանդները փոխհատուցվելու են նպաստառուների
աւանդների փոխհատուցման համար 2010թ.-ի պետբիւջէով նախատեսուած
գումարներից: