«Արդշինինվեստբանկ»-ի «Գորիս» մասնաճիւղի 7 աշխատակիցներ
մեղադրւում են յանցաւոր ճանապարհով ստացուած եկամուտներն
օրինականացնելու մէջ
07-04-2010 19:52:00 | Հայաստան | Հասարակութիւն
ԵՐԵՎԱՆ, 7 ԱՊՐԻԼԻ, ՆՈՅԵԱՆ ՏԱՊԱՆ: Հայաստանի Ազգային
անվտանգութեան ծառայութեան Քննչական վարչութիւնում աւարտուել է
«Արդշինինվեստբանկ»-ի «Գորիս» մասնաճիւղի կառավարչի կողմից
խաբէութեամբ առանձնապէս խոշոր չափերի գումար յափշտակելու եւ
յանցաւոր ճանապարհով ստացուած եկամուտներն օրինականացնելու փաստի
առթիւ յարուցուած քրէական գործի նախաքննութիւնը: Քրէական գործի
նախաքննութեան օրինականութեան նկատմամբ հսկողութիւն իրականացնող
դատախազը հաստատել է մեղադրական եզրակացութիւնը:
ՀՀ Գլխաւոր դատախազութեան պետական շահերի վարչութեան հարուցած
քրէական գործի նախաքննությամբ, որի կատարումը յանձնարարուել էր
ԱԱԾ-ի Քննչական վարչութեանը, պարզուել եւ հիմնավորվել է, որ
«Արդշինինվեստբանկ»-ի «Գորիս» մասնաճիւղի կառավարիչ Հ.Բախշեանը
2006-2009թթ.-ին թւով 95 ֆիզիկական եւ 5 իրաւաբանական անձանց
անուններով ձեւակերպել է կեղծ վարկեր, որոնց ընդհանուր գումարը
կազմում է 918 մլն 789 հազար 604 դրամ: Վարկերը ձեւակերպուել,
ելքագրվել եւ իւրացուել են նրա կողմից փաստացի ղեկավարւող
ընկերութիւնների գործունէութեան եւ անձնական կարիքների համար, իսկ
մի մասն էլ ուղղուել է կեղծ վարկերը եւ դրանց տոկոսները մարելուն:
Այդ գործողութիւններով Հ.Բախշեանը, նախաքննական մարմնի
գնահատմամբ, թաքցրել եւ խեղաթիւրել է նախկինում հափշտակած
առանձնապէս խոշոր չափերի հասնող ընդհանուր առմամբ 496 մլն 863,5
հազար դրամ գումարի իրական բնոյթը, ծագման աղբիւրները, տեղաշարժը
եւ օրինականացրել յանցաւոր ճանապարհով ստացած եկամուտները:
Արդիւնքում` «Արդշինինվեստբանկ»-ին պատճառուել է 693 մլն 808 հազար
812 դրամ գումարի գոյքային վնաս:
Ըստ ՀՀ Գլխաւոր դատախազութեան մամուլի ծառայութեան,
նախաքննությամբ ձեռք բերուած ապացոյցների հիման վրայ «Գորիս»
մասնաճիւղի 7 աշխատակցի, նրանց թւում մասնաճիւղի կառավարչին,
գլխաւոր հաշվապահին եւ գանձապահին, հաշուապահութեան եւ վարկային
բաժնի աշխատակիցներին, առաջադրուել է մեղադրանք: Մասնաւորապէս,
«Գորիս» մասնաճիւղի կառավարիչ Հ Բախշեանին մեղադրանք է առաջադրուել
ՀՀ Քրէական օրէնսգրքի 179-րդ յօդուածի 3-րդ մասի 1-ին կէտով եւ
190-րդ յօդուածի 3-րդ մասի 1-ին կէտով, իսկ մյուսներին` ՀՀ Քրէական
օրէնսգրքի 38-179-րդ յօդուածի 3-րդ մասի 1-ին կէտով: Քրէական գործն
ուղարկուել է Սիւնիքի մարզի ընդհանուր իրաւասութեան առաջին ատեանի
դատարան` ըստ էութեան քննելու: