Մարդու իրաւունքների պաշտպանն առաջարկում է վերանայել երկքաղաքացիութիւն ունեցող անձանց որպէս թեկնածու առաջադրուելու իրաւունքի սահմանափակումը
13-04-2011 16:42:00 | Հայաստան | Մարդու իրաւունքներ
ՀՀ Մարդու իրաւունքների պաշտպան Կարէն Անդրէասեանը ՀՀ Ազգային ժողովին է ներկայացրել ,հհ ընտրական օրէնսգիրքէ ՀՀ օրէնքի նախագծի վերաբերեալ մի շարք հայեցակարգային առաջարկութիւններ եւ դիտողութիւններ:
Պաշտպանն առաջարկում է վերանայել երկքաղաքացիութիւն ունեցող անձանց որպէս թեկնածու առաջադրուելու իրաւունքի սահմանափակումը, նկատի ունենալով, որ երկքաղաքացիութիւն ունեցող անձինք չպէտք է ունենան աւելի քիչ իրաւունքներ, քան միւս քաղաքացիները:
Կարէն Անդրէասեանն անհրաժեշտ է համարում վերանայել տեղամասային ընտրական յանձնաժողովների ձեւաւորման կարգը եւ առաջարկւում է լրացում կատարել Կենտրոնական ընտրական յանձնաժողովի կազմաւորման կարգում: Առաջարկւում է նաեւ լրացուցիչ քննարկել Հանրապետութեան Նախագահի թեկնածու ինքնաառաջադրուելու հնարաւորութեան բացակայութեան հարցը, ինչը, Պաշտպանի գնահատմամբ, անհարկի սահմանափակում է քաղաքացիների ընտրական իրաւունքը: Քննարկման թեմա է նաեւ ՀՀ ԱԺ պատգամաւորի թեկնածու ինքնաառաջադրուելու հնարաւորութեան բացակայութեան խնդիրը: Առաջարկւում է քննարկել ժամանակաւորապէս արտերկրում գտնուող ՀՀ բոլոր քաղաքացիներին էլեկտրօնային եղանակով քուէարկելու հնարաւորութիւն ընձեռելու տարբերակը, որպէս կամքի ազատ արտայայտման իրաւունքի իրացում:
Բացի այդ, քուէարկութեանը մասնակցելու դժուարութիւններ ունեցող ընտրողների համար քուէարկութեան մատչելիութեան դրոյթը կանոնակարգման եւ եզրոյթների յստակեցման կարիք ունի ` տարաբնոյթ մեկնաբանութիւններից խուսափելու համար:
Պաշտպանը մատնանշել է նաեւ համայնքի ղեկավարի ընտրութեան կարգում առկայ հակասութիւնը` միաթեկնածու ընտրութեան կայացման հնարաւորութեան, իսկ մէկ այլ կէտով դրա բացառման տեսքով: Առաջարկութիւններ կան նաեւ ընտրական ցուցակներում կանանց ներկայացուածութեան կարգերի վերաբերեալ եւ այլն: