ՀՀ-ՈՒՄ ԳՐԱՆՑՈՒԱԾ ԱՌԵՎՏՐԱՅԻՆ ԻՐԱՒԱԲԱՆԱԿԱՆ ԱՆՁԱՆՑ ԹԻՒԸ ՄԷԿ
ՏԱՐՈՒՄ ԱՃԵԼ Է 5,2%-ՈՎ, ԻՍԿ ԱՆՀԱՏ ՁԵՌՆԱՐԿԱՏԷՐԵՐԻՆԸ` 34,94%-ՈՎ
04-11-2008 18:00:00 | Հայաստան | Տնտեսութիւն
ԵՐԵՎԱՆ, 4 ՆՈՅԵՄԲԵՐԻ, ՆՈՅԵԱՆ ՏԱՊԱՆ: ՀՀ Արդարադատութեան
նախարարութեան Իրաւաբանական անձանց եւ անհատ ձեռնարկատէրերի
պետական ռեգիստրի գործակալութեան տուեալներով, 2008թ.-ի
յունուար-սեպտեմբերին գրանցուել են 2 հազ. 798 առեւտրային
իրաւաբանական անձինք եւ 13 հազ. 956 անհատ ձեռնարկատէրեր, որոնց
ընդհանուր թիւը 2008թ.-ի հոկտեմբերի 1-ի դրութեամբ կազմել է,
համապատասխանաբար, 58 հազ. 598 եւ 63 հազ. 263: ՀՀ Ազգային
վիճակագրական ծառայութեան տուեալներով, 2007թ.-ի հոկտեմբերի 1-ի
դրութեամբ գրանցուած են եղել 55 հազ. 708 իրաւաբանական անձինք եւ 46
հազ. 881 անհատ ձեռնարկատէրեր: Մէկ տարուայ ընթացքում իրաւաբանական
անձանց թիւն աճել է 5,2%-ով, իսկ անհատ ձեռնարկատէրերինը`
34,94%-ով:
2008թ.-ի յունուար-սեպտեմբերին լուծարուել են 747 իրաւաբանական
անձինք եւ 1 հազ. 141 անհատ ձեռնարկատէրեր:
2008թ.-ի յունուար-սեպտեմբերին գրանցուած 2 հազ. 798
իրաւաբանական անձինք կատարել են մօտ 17 մլրդ 808,08 մլն դրամի (մօտ
58 մլն 230,6 հազ. ԱՄՆ դոլար) ներդրումներ: Օտարերկրեայ
ներդրումներով հիմնուած 283 ձեռնարկութիւններում կատարուել են 9
մլրդ 161,35 մլն դրամի ներդրումներ, որոնցից միայն օտարերկրեայ
իրաւաբանական անձանց եւ քաղաքացիների կողմից հիմնադրուած 167
ձեռնարկութիւններում` 7 մլրդ 102,42 մլն դրամի, իսկ 116 համատեղ
ձեռնարկութիւններում` 2 մլրդ 58,93 մլն դրամի ներդրումներ: