ԵՐԵՎԱՆ, 14 ՅՈՒԼԻՍԻ, ՆՈՅԵԱՆ ՏԱՊԱՆ: ՀՀ նախագահի աշխատակազմի ղեկավար Հովիկ Աբրահամեանի եւ Եւրոպայի Խորհրդի մարդու իրաւունքների յանձնակատար Թոմաս Համմարբերգի յուլիսի 14-ի հանդիպմանը քննարկուել են Եւրոպայի Խորհրդի Խորհրդարանական Վեհաժողովի թիւ 1609 եւ 1620 բանաձեւերի կատարման ընթացքը, մասնաւորապէս, անդրադարձ է եղել անազատութեան մէջ գտնուող անձանց իրաւական կարգավիճակի եւ մարտի 1-ի իրադարձութիւնների անկախ հետաքննութեան խորհրդարանական ձեւաչափի հետ կապուած հարցերին: ԵԽ մարդու իրաւունքների յանձնակատարն այս խնդիրների վերաբերեալ սեպտեմբեր ամսին մոնիտորինգի յանձնաժողովում պէտք է ներկայացնի զեկոյց: Ինչպէս «ՆՈՅԵԱՆ ՏԱՊԱՆ»-ին յայտնեցին ՀՀ նախագահի Մամլոյ գրասենեակից, Հ.Աբրահամեանը վստահեցրել է, որ Հայաստանի իշխանութիւնները հաստատակամ են մարտի 1-ի իրադարձութիւնների լիարժէք հետաքննութեան եւ մեղաւորներին պատժելու հարցում: Նա միաժամանակ ընդգծել է, որ որեւէ մէկը չի կարող հետապնդվել քաղաքական հայեացքների համար:

---