ԵՐԵՎԱՆ, 18 ՅՈՒՆԻՍԻ, ՆՈՅԵԱՆ ՏԱՊԱՆ: Այս տարի, յուլիսի 13-20-ը կայանալիք «Ոսկէ ծիրան» միջազգային 5-րդ փառատոնը չի ունենայ ո'չ բացման, եւ ո'չ էլ փակման հանդիսաւոր արարողութիւններ: Այս մասին յունիսի 18-ին մամլոյ ասուլիսում յայտարարեց փառատոնի տնօրէն, կինոռեժիսոր Յարութիւն Խաչատրեանը: Նրա խօսքերով, «աւելի լաւ է այդ գումարները ծախսուեն ֆիլմեր բերելու, քան թէ համերգային ծրագրեր պատրաստելու համար», մանաւանդ, որ բոլոր ծանրակշիռ փառատոները շատ համեստ բացում եւ փակում են կազմակերպում: Յարութիւն Խաչատրեանը նշեց, որ փառատօնային բոլոր ֆիլմերի տոմսերի արժէքը լինելու է 300 դրամ շնորհիւ «Վիվասել» ընկերութեան, որը «Մոսկուա» եւ «Նաիրի» կինոթատրոններին պէտք է փոխանցի տոմսերի արժէքի մնացած 1200 դրամը:

---