Ս.Պետրոսեանը որպէս հիմնադիր անդամ մասնակցել է
«Եվրամիջերկրական տարածաշրջանի գիտութիւնների եւ արուեստի
միջազգային ակադեմիայի» նիստին
31-03-2010 18:30:00 | | Հասարակութիւն
ՍՊԱՐՏԱ, 31 ՄԱՐՏԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Մարտի 26-29-ը
ՀՀ սփիւռքի նախարարի տեղակալ Ստեփան Պետրոսեանը աշխատանքային
այցով գտնւում էր Յունաստանի Հանրապետութիւնում: Ինչպէս
տեղեկացրեցին ՀՀ սփիւռքի նախարարութիւնից, այցի հիմնական նպատակն
էր մասնակցել «Եվրամիջերկրական տարածաշրջանի գիտութիւնների եւ
արուեստի միջազգային ակադեմիայի» ստեղծման գործընթացին: Վերջինիս
ստեղծման նախաձեռնութեամբ հանդէս էին եկել աշխարհի 13 երկրների
նշանաւոր գիտնականներ եւ արուեստի գործիչներ: Միջազգային ակադեմիայի
հիմնադիր անդամներից է նաեւ պրոֆեսոր Ստեփան Պետրոսեանը:
Ակադեմիայի գլխաւոր նպատակն է միջազգային երկխօսութեան
ճանապարհով նպաստել Եվրամիջերկրական տարածաշրջանի երկրների
համագործակցութեանը եւ զարգացմանը:
Հիմնադիր նիստը տեղի ունեցաւ Սպարտա քաղաքում:
Ակադեմիայի ստեղծման գործընթացին աջակցում էին Յունաստանում
ԵՈՒՆԵՍԿՕ-ի յանձնաժողովը եւ Յունաստանում գործող Եվրամիջերկրական
տարածաշրջանի մշակոյթային կենտրոնը: Հիմնադիր նիստում ընդունուեց
հռչակագիր ակադեմիայի ստեղծման վերաբերեալ:
Յաջորդ օրը տեղի
ունեցաւ կոնֆերանս` նուիրուած տարածաշրջանի էներգետիկ անվտանգութեան
եւ կայուն զարգացման հիմնախնդիրներին, որում ՀՀ սփիւռքի նախարարի
տեղակալ Ս. Պետրոսեանը հանդէս եկաւ «Համագործակցութիւնը գիտութեան
եւ տեխնիկայի բնագաւառում` որպէս 21-րդ դարում հասարակութիւնների
կայուն զարգացման գրաւական» թեմայով զեկույցով:
ՀՀ սփիւռքի
նախարարի տեղակալը հանդիպումներ ունեցաւ նաեւ Յունաստանի հայկական
համայնքային կառոյցների ներկայացուցիչների հետ: Մասնաւորապէս,
հանդիպումներ տեղի ունեցան Յունաստանում Հայ օգնութեան միութեան,
Հայ Յեղափոխական Դաշնակցութեան եւ Հայ Բարեգործական Ընդհանուր
Միութեան կառոյցների ներկայացուցիչների հետ: Այդ հանդիպումների
ընթացքում Ս. Պետրոսեանը ներկայացրեց ՀՀ սփիւռքի նախարարութեան
գործունէութիւնը, ծրագրերը, քննարկվեցին Ազգային Խորհրդի
ձեւաւորման սկզբունքները, ինչպէս նաեւ նախարարութեան ծրագրերին
համայնքային կառոյցների մասնակցութեան հարցեր: