ՄԻՍԼԱՏԱ, 2 ՄԱՐՏԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Օրերս «Արարատ»
միութիւնում շնորհուել են իսպաներենի հերթական` ութերորդ կուրսի
աւարտական դիպլոմները: Հանդիսաւոր արարողութեանը ներկայ են եղել
Միսլատայի քաղաքապետ Մանուել Կորդերան, Օտարերկրացիների հարցերով
խորհրդական Կառլոս Խարիյոն եւ Ձախ միութեան խորհրդական Սալվադոր
Գարսիան: «Արարատ» հայկական միութեան մամլոյ հաղորդագրութիւնից
տեղեկանում ենք, որ իսպաներենի 8-րդ կուրսի երկու ամիս տեւած
դասընթացների ընթացքում իսկական բարեկամութիւն է հաստատուել կուրսի
6 ազգի` հայ, ալժիրցի, մարոկացի, սենեգալցի, նիգերիացի եւ թուրք
ներկայացուցիչների միջեւ: Նրանց մէջ առանձնապէս աչքի են ընկել
հայուհի Տաթեւիկ Գրիգորեանը եւ ազգութեամբ թուրք Էրկանը: Կուրսն
իսկական անակնկալ էր «Արարատ» միութեան նախագահ, ուսուցիչ Արարատ
Ղուկասեանի համար, երբ տեղեկացաւ, որ դասարանում մէկ թուրք աշակերտ
կայ:
Բացման խօսքով հանդէս է եկել Մանուել Կորեդերան: Նա
շնորհակալութիւն է յայտնել «Արարատ» միութեանը եւ անձամբ Արարատ
Ղուկասեանին նրա աննախադէպ, անշահախնդիր եւ չափազանց կարեւոր
աշխատանքի համար, որը նպաստում է տարբեր ազգերի ինտեգրմանն ու
համակեցութեանը:
Քաղաքապետը ցանկութիւն է յայտնել լուսանկարվել Արարատի եւ
Էրկանի հետ, մի քայլ, որը հայկական միութեան նախագահը համարել է
մշակոյթային կամուրջ` Միսլատայի կողմից: Ամենանշանակալի փաստն այն
է, որ 22-ից աւելի ազգերի ներկայացուցիչներին քաղաքապետարանի
կողմից շնորհուած այս պատվոգրերում նշուած է, որ դասընթացներն անց է
կացրել «Արարատ» հայկական միութիւնը: