PFA-ն հրապարակել է Հայաստան-Սփիռք յարաբերութիւններին
նուիրուած զեկոյցը
01-03-2010 20:40:00 | ԱՄՆ | Քաղաքական
ՎԱՇԻՆԳՏՈՆ, 1 ՄԱՐՏԻ, ՆՈՅԵԱՆ ՏԱՊԱՆ: Policy Forum Armenia
(PFA) կազմակերպութիւնը փետրուարի 28-ին Վաշինգտոնում մեկնարկած իր
Երկրորդ տարեկան համաժողովում հրապարակել է «Հայաստան-Սփիռք
յարաբերութիւններ. Անկախութիւնից 20 տարի անց» զեկոյցը, որով
PFA-ն ազդարարում է ազգային զեկույցների շարքի սկիզբ:
Բացման խօսքով հանդէս է եկել Բրուքինգսի հաստատութեան աւագ
գիտաշխատող Դանիէլ Կաուֆմանը: Նա նշել է, որ որեւէ երկրի
բարեկեցութիւն կախուած է լաւ կառավարումից եւ հակակոռուպցիոն
քաղաքականութիւնից, իսկ արտաքին գործօններից կախումը սովորաբար
չափազանցուած է: «Չկան տնտեսական հրաշքներ, կան ազգային
նուաճումներ»,- ասել է դոկտոր Կաուֆմանը:
PFA-ի զեկոյցը անդրադարձ է Հայաստանի եւ աշխարհասփիւռ
հայութեան միջեւ յարաբերութիւններին: Այն փորձ է անում գնահատել
Հայաստանի եւ Սփիւռքի համար` զարգացման եւ անվտանգութեան
խնդիրների առկայ վիճակն ու հեռանկարները: Զեկոյցը գնահատում է հայ
ժողովրդի երկու մասերի փոխներգրավվածությունը վերջին երկու
տասնամեակում: Սփիւռքի ներգրավվածությունը Հայաստանի կեանքում
դիտարկւում է երեք հարթութիւնում` տնտեսական զարգացում,
կառավարում եւ հանրային սեկտորի բարեփոխումներ, քաղաքացիական
հասարակութեան կայացում: Գիտակցելով Հայաստանին աջակցելու համար
անկախութեան վաղ շրջանում պահանջված ջանքերն ու արուած
զոհողությունները, զեկոյցը քննադատական հայեացք է նետում նշուած
կարեւոր հարթութիւններում ունեցած ձեռքբերումների վրայ եւ
վերլուծում ստացուած արդիւնքների պատճառները: Վերջապէս, զեկոյցն
առաջարկում է համատեղ գործունէութեան ծրագիրը, որը ճիշտ արժէքների
եւ նպատակների որդեգրման եւ պատշաճ կիրառման դէպքում կօգնի
դիմակայել հայ ժողովրդի առջեւ ծառացած` զարգացման եւ
աշխարհաքաղաքական մարտահրավերներին:
Զեկոյցը համաժողովում ներկայացրել են PFA-ի թիմի անդամները`
Ասպետ Գոչիկյանը, Դավիթ Գրիգորեանը, Էդգար Մարտիրոսեանը եւ Զաւէն
Քալաջյանը: Քննարկումը վարում էր Հայաստանում ԱՄՆ-ի նախկին դեսպան
Ջոն էվանսը: Զեկոյցի եւ ընդհանուր թեմայի շուրջ տեսակետներ են
փոխանակել ԱՄՆ-ում ՀՀ առաջին դեսպան, Թաֆթս համալսարանի պրոֆեսոր
Ռուբէն Շուգարեանը եւ կանադացի դոկտոր Ռազմիկ Փանոսյանը, ինչպէս
նաեւ համաժողովի այլ մասնակիցներ:
«Հայաստան-Սփիռք յարաբերութիւններ. Անկախութիւնից 20 տարի
անց» զեկոյցն առաջինն է PFA-ի մեկնարկած ազգային զեկույցների
շարքում: Կազմակերպութիւնը նախկինում հրապարակել է Հայաստանին
վերաբերող մի շարք այլ զեկույցներ:
Հայաստան-սփիռք յարաբերութիւններին վերաբերող խնդիրների
քննարկում PFA-ի Երկրորդ տարեկան համաժողովում կշարունակուի: Մարտի
1-ին յատուկ ուղերձով հանդէս կգայ ՀՀ արտաքին գործերի առաջին
նախարար, «Ժառանգութիւն» կուսակցութեան հիմնադիր Րաֆֆի
Յովհաննիսեանը: Զեկուցողների թւում են Փարիզի Պանթեոն-Ասսաս
համալսարանի իրաւագիտութեան պրոֆեսոր Քեթրին Քեսեջյանը, Կանադայում
ՀՀ նախկին դեսպան, «Մոդուս Վիվենդի» կենտրոնի նախագահ Արա Պապեանը,
ՀՀ ԱԺ պատգամաւորներ Լարիսա Ալավերդեանը եւ Արծուիկ Մինասեանը:
Զեկոյցը կհրապարակուի PFA-ի պաշտօնական կայքէջում
(www.pf-armenia.org):