ԵՐԵՎԱՆ, 2 ՓԵՏՐՈՒԱՐԻ, ՆՈՅԵԱՆ ՏԱՊԱՆ:Համաշխարհային բանկի եւ «Քաունթերփարթ ինտերնեշնլ»-ի հայաստանեան գրասենեակների, «Ջինիշյան յիշատակի հիմնադրամ»-ի հետ համատեղ իրականացyող «Քաղաքացիական հասարակութեան հիմնադրամ-2010» ծրագրի շրջանակներում հրատարակուել է «Հետաքննող լրագրողներ» հասարակական կազմակերպութեան կազմած «Արդիւնաւէտ հանրային պաշտպանութիւն» տեղեկագիրը: Ինչպէս տեղեկագրի փետրուարի 2-ի շնորհանդէսին նշեց ծրագրի ղեկավար Սառա Պետրոսեանը, տեղեկագիրը շուրջ 8 ամիս տեւած ուսումնասիրութեան արդիւնք է. Հայաստանի Գեղարքունիքի, Կոտայքի եւ Արագածոտնի մարզերում, որտեղ առաւել շատ են հանրային պաշտպաններից հրաժարման դէպքերը, ուսումնասիրուել է հանրային պաշտպանների գործունէութիւնը: Սա, ըստ ծրագրի ղեկավարի, առիթ էր ուսումնասիրելու նաեւ, թէ շուրջ 4 տարի առաջ ներդրուած ինստիտուտն ինչպէս է իրականացնում անվճարունակ խաւի պաշտպանութիւնը: Ինստիտուտի արդիւնաւէտ գործունէութեան խոչընդոտների թւում նշուեց այն, որ կառոյցի ներդրման մասին հանրային իրազեկում չի կատարուել եւ անվճարունակ մարդկանց մեծ մասը տեղեակ չէ կառոյցի գոյութեան, նրա մատուցած ծառայութիւնների շրջանակի մասին: Միաժամանակ մարդիկ չեն հաւատում, որ քննիչի կողմից հրաւիրուած եւ պետութեան կողմից վարձատրւող պաշտպանը կարող է օբյեկտիվ պաշտպանութիւն իրականացնել: «Մարզերում որոշ հանրային պաշտպանների գործունէութիւնը լիարժէք հիմք է տալիս նման մտածելակերպի արմատաւորմանը»,- նշւում է տեղեկագրի առաջաբանում: Ուսումնասիրությունները հիմք են տալիս եզրակացնելու, որ չքավոր խաւի պաշտպանութեան իրաւունքի արդիւնաւէտութիւնը բարձրացնելու համար անհրաժեշտ է կատարել օրենսդրական փոփոխութիւններ: Մասնաւորապէս, Քրէական դատաւարութեան օրէնսգրքում փոփոխութեամբ նաեւ քաղաքացիները հնարաւորութիւն պէտք է ունենան դիմելու հանրային պաշտպանին (ըստ գործող օրէնքի, հանրային պաշտպանը ներգրավւում է քննիչի կամ դատարանի կողմից): Հայաստանի Փաստաբանների պալատի նախագահ Ռուբէն Սահակեանի կարծիքով, ուսումնասիրութիւնը իւրայատուկ մոնիտորինգ է, որը հնարաւորութիւն է տալիս ի յայտ բերել հանրային պաշտպանի ինստիտուտի բացերը: Նա գտնում է, որ նման մոնիտորինգները պէտք է աւելի յաճախ անցկացուեն:

---