Ռոզա Ճագըճյան. «Չեք կարող պատկերացնել, թէ ինտերնետից մեր
փոքրիկները որքան տեղեկատուութիւն են հաւաքում Հայաստանի եւ հայ
մշակոյթի մասին...»
27-01-2010 13:00:00 | | Մշակոյթ
ՄՈՆՏԵՎԻԴԵՈ, 27 ՅՈՒՆՎԱՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ:
Ուրուգվայաբնակ Ռոզա Ճագըճյանը 1959-60 թթ. եղել է Երեւանի պետական
պարարուեստի ուսումնարանի առաջին սփյուռքհայ ուսանողը, եւ ուսանել է
այդ ժամանակի մեծ վարպետների մօտ: Տարիներ ի վեր Ռոզա Ճագըճյանը
ինքն է սովորեցրել մանուկներին պարել` պարել հայերէն...
«Իմ ողջ կեանքում աշխատել եմ մշակոյթի ոլորտում, եղել եմ
պարուսույց, թէեւ այժմ արդէն թոշակի եմ անցել: Առաջին անգամ
Հայաստան այցելել եմ 50 տարի առաջ` ուսումնասիրելու հայկական
պարարվեստը: Եղել եմ Թաթուլ Ալթունեանի երգի-պարի, Էդվարդ
Մանուկեանի պետական պարախմբում եւ Երեւանի Պիոներպալատում: Ինձ
համար սրանք անմոռանալի պահեր էին: Առաջին անգամ իրապէս առնչւում
էի հայկական պարին: Սքանչելի էր»,- «Հայերն Այսօր»-ին տուած
հարցազրոյցում պատմում է Ռոզա Ճագըճյանը:
- Արդեօ՞ք, միայն այդ այցը բաւական էր ընկալելու հայ
պարարվեստը, այն լիարժէք զգալու, հասկանալու եւ սովորելու համար:
- Ոչ, ի՞նչ եք ասում: Ես Հայաստան գալիս եմ արդէն 6-րդ անգամ
եւ ամէն անգամ միայն մէկ նպատակ եմ հետապնդել` է'լ աւելի
խորութեամբ ընկալել հայկական պարը, հայ արուեստը: Հայաստանում եղել
եմ նաեւ 1972, 1987, 1999 եւ 2001 թուականներին: Վերջին
այցելութիւնս առնչւում էր նաեւ Հայաստանում քրիստոնեության
ընդունման 1700 ամեակին:
- Ձեր վարպետութիւնը փոխանցո՞ւմ եք երիտասարդներին:
- 1960 թ.-ից Մոնտեվիդեոյում գործում էր «Գայեանէ» հայկական
կենտրոնը եւ նույնանուն պարախումբ Բուենոս Այրէսում: Հենց նոյն այդ
ժամանակից էլ պարուսույց եմ աշխատում: 1967-ին ստեղծեցի «Մարալիկ»
պարախումբը, ապա Նուբարեան վարժարանի «Արփինէ» անսամբլը, որն արդէն
նաեւ երգչախումբ ուներ, այսպէս ասած` երգի-պարի անսամբլ էր:
Վերջինիս երեք ելոյթներին ներկայ է եղել նաեւ Ալեք Մանուկեանը:
Մինչ օրս էլ զբաղւում եմ պարի ուսուցմամբ, իհարկէ այժմ, միայն
Նուբարեան վարժարանի Ալեք Մանուկեան երկրորդական դպրոցում:
- Ձեր սաները ազգութեամբ միայն հայե՞ր են:
- Չգիտեմ ինչ ասել` ցավո՞ք, թէ՞ բարեբախտաբար` ոչ:
Ուրախութեամբ պէտք է նշեմ, որ տեղացիները նույնպես մեծ
հետաքրքրութիւն են դրսեւորում մեր արուեստի եւ յատկապէս պարարուեստի
նկատմամբ: Ուրուգվայում քիչ չեն պետական դպրոցները, որոնցից մէկն
էլ` 156 համարը, «Արմէնիա» է կոչւում: Մոնտեվիդեոյի
կառավարութիւնը դպրոցը կոչեց «Արմէնիա» Հայոց Մեծ Եղեռնի ժամանակ:
Այստեղ ուսանում են հիմնականում տեղացիներ, սակայն սիրում են
հայկական պարերը, ծանօթ են հայ արուեստին ու մշակոյթին: Ամէն տարի
ապրիլի 24-ին այցելում են Ցեղասպանութեան զոհերի յիշատակին նուիրուած
յուշարձանը:
- Ինչպե՞ս կբնութագրեիք հայ պարը:
- Առաջին անգամ Թաթուլ Ալթունեանի խմբում հայ պարը տեսնելով`
հիացա հայ աղջիկների նազանքով եւ տղամարդկանց խրոխտությամբ: Ես շատ
եմ սիրում հայ պարը եւ շատ եմ ուզում, որպեզի հայկական պարում
մշտապէս պահպանուի հայկականը: Ցավոք, ժամանակակից պարային
բեմադրումներում դժուվար նկատելի են հայկական տարրերը,
հայկականությունը, երբեմն նոյնիսկ ընդհանրապես դժուվար է
պատկերացնել, թէ ինչ է բեմադրուած` այսօր մի քիչ մոդեռն են դարձրել
հայկական պարը:
Ես շատ եմ սիրում, երբ կանայք են պարում` նազանքով,
հեզաճկուն, նուրբ: Սիրում եմ նաեւ, երբ նրանք աւելի ճարպիկ են,
այսինքն, կարող են «խաղալ»: Եվ հրաշալի է այն պահը, երբ կանանց
նազանի պարին յաջորդում է տղամարդկանց խրոխտ, ըմբոստ եւ առնական
պարը` կտրուկ շարժումներով, ուժեղ:
Երբ մենք փոքրիկներին սովորեցնում ենք «Թամզարա», «Սասուն»,
«Մուսալեռ» եւ նման այլ պարեր, ապա քարտեզի վրայ նրանց նոյնիսկ
ներկայացնում ենք, թէ որտեղ է գտնւում Մուսալեռը կամ Սասունը`
միաժամանակ ներկայացնելով Երկրի եւ յատկապէս տուեալ վայրի
պատմութիւնը, բացատրում ենք պարի էությունը: Այսպիսով, փոքրիկները
պարը սովորելու հետ ուսումնասիրում եւ յուրացնում են նաեւ հայոց
պատմութիւնը:
- Դա հրաշալի տարբերակ է:
- Նոյն կերպ ներկայացնում ենք նաեւ հայկական տարազները:
Ասենք, ներկայացնելով Գիւմրու տարազը, ներկայացնում ենք նաեւ
Գիւմրուայ պատմութիւնը: Գիտէ՞ք, ես տանը մի տարազ ունեմ, որն արդէն
120 տարեկան է: Հայաստանում եմ այն ձեռք բերել 1960 թուականին: Այն
Գիւմրուայ տարազ է եւ գօտու վրայ գրուած է. «Փետրվար 21, 1888:
Վայելի, ով որ կապի»:
Ծնուել եմ Մոնտեվիդեոյում, բայց կարծես Հայաստանում ծնուած
լինեմ, այնքան մեծ է կարոտս:
- Իսկ Ձեր պարախմբերը, բացի դպրոցում ունեցած համերգներից,
հանդէս գալի՞ս են շրջակայ միջավայրում` համայնքային հաւաքներ, այլ
դպրոցների բեմեր եւ այլն:
- Այո, իհարկէ, մենք յաճախ հանդէս ենք գալիս տարբեր
դպրոցներում: Ուրուգվայում տոնվում է Քաղաքի օրը: Այստեղ նույնպես
մենք հանդէս ենք գալիս ոչ միայն մեր հայկական ճաշատեսակների
ցուցադրմամբ եւ հյուրասիրությամբ, այլ նաեւ մեր պարախմբով:
Իւրաքանչիւր տարուայ հոկտեմբեր ամսին Ուրուգվայում նշւում է
Արուեստի տոնը: Այստեղ նույնպես սիրով են սպասում հայկական պարերին:
Նաեւ մշակոյթի տոներ են նշւում դպրոցներում, ուր նույնպես
առաջնայնորեն ներկայացւում է հայկական պարը: Դպրոցների մեծ մասում
սովորում են տեղացի աշակերտներ, սակայն նրանց մեծ մասը գիտէ, թէ
ինչ է Արարատը եւ ով է Մեսրոպ Մաշտոցը:
- Հհետաքրքիր է, ուրուգվայցի երեխային ինչո՞ւ է հետաքրքրում
Արարատը, ինչո՞ւ են նրանք ուզում սովորել հայ պարը, մշակոյթը:
Պէտք է ենթադրել, որ դա մեր քարօզչութեան արդեօ՞ւնքն է:
- Իհարկէ, հայկական դպրոցում անպայման պէտք է հայկական երգ,
պար ու թատրոն լինի: Իհարկէ, մենք նաեւ ուզում ենք, որպէսզի օտարն
էլ իմանա, թէ որտեղ է Հայաստանը, ինչ է Արարատը հայի համար, որտեղ է
Երեւանը եւ այլն: Չեք կարող պատկերացնել, թէ ինտերնետից փոքրիկներն
որքան տեղեկատուութիւն են հաւաքում Հայաստանի, հայ մշակոյթի մասին:
- Իսկ Ուրուգուայի հայկական դպրոցում աշակերտութիւնը
բազմաշե՞րտ է, թէ հայերն են գերակշռող մաս կազմում:
- Օրինակ մեզ մօտ` Նուբարեան դպրոցում, հայեր կան, բայց
ափսոս, քիչ են: Սակայն այս վարժարանում բոլորը պարտադիր` անկախ
ազգութիւնից, սովորում են հայերէն, ծանօթանում հայ մշակոյթին:
- Այսինքն, հայերէնը պարտադի՞ր է:
- Այո, եթէ այս դպորցն են գալիս, ուրեմն պարտադիր պէտք է
ուսանեն հայոց լեզու, պատմութիւն. արուեստ...
- Իսկ Ուրուգուայի համայնքը մե՞ծ է:
- Մօտ 12.000 մարդ:
- ՀՀ սփիւռքի նախարարութիւնը ինչո՞վ կարող է ձեզ սատարել:
- Լաւագոյն օգնութիւնը կլինի, եթէ նախարարութիւնը կարողանայ
մեզ օգնել ազգային տարազներ եւ գրականութիւն ձեռք բերելու
հարցում: Ես մինչեւ հիմա իմ դրամով եմ դրանք ձեռք բերել, սակայն
արդէն թոշակի եմ անցել, եւ, բնականաբար, դրամի սուղություն է
նկատւում: Սեփական միջոցներով որքան կարողացա, արեցի, բայց արդէն
դժուարանում եմ: Իհարկէ, մեզ անհրաժեշտ են նաեւ հայկական
երաժշտություն, սկաւառակներ, տարազներ: Այս ամէնն իրոք մեզ համար
խնդիր է, մենք բաւական հեռու ենք Արգենտինայից, այնպէս որ այնտեղից
էլ չենք կարողանում նման բաներ ձեռք բերել:
- Իսկ Արգենտինայի եւ Ուրուգուայի դպրոցների միջեւ շփում կայ՞:
- Նախատեսել ենք այցելել Մարի Մանուկեանի դպրոց: Յուսով ենք,
փոքրիկները սիրով կծանօթանան միմեանց հետ եւ բարեկամական
յարաբերութիւններ կունենան, միասին պար կբեմադրեն:
- Ծանո՞թ եք սփիւռքի նախարարութեան «Արի տուն» ծրագրին:
- Այո, իհարկէ, տեղեկացված ենք եւ մեծագոյն ցանկութիւն
ունենք մասնակցելու այս ծրագրին: Կարելի է ասել նոյնիսկ, որ սա
մեր բաղձանքն է:
ՐԱՖՖԻ Ն.Մ.