ԵԱՀԿ-Ի ԵՐԵՎԱՆՅԱՆ ԳՐԱՍԵՆԵԱԿԻ ԱՋԱԿՑՈՒԹԵԱՄԲ ԵՊՀ-ՈՒՄ ԲԱՑՈՒԵԼ Է
ԷԿՈԼՈԳԻԱԿԱՆ ԻՐԱՒՈՒՆՔԻ ԿԵՆՏՐՈՆ
16-09-2008 20:45:00 | Հայաստան | Հասարակութիւն
ԵՐԵՎԱՆ, 16 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Սեպտեմբերի 16-ին
Երեւանի Պետական համալսարանի Իրաւագիտութեան ֆակուլտետում ԵԱՀԿ
երեւանեան գրասենեակի աջակցութեամբ «Շրջակայ միջավայր եւ
անվտանգութիւն» նախաձեռնութեան շրջանակներում բացուել է
էկոլոգիական իրաւունքի գիտաուսումնական կենտրոն:
Ըստ ԵՊՀ-ի ռեկտոր Արամ Սիմոնեանի, Կենտրոնը կհանդիսանայ
կրթական եւ ռեսուրսային կայան` բնապահպանական օրենսդրութիւնը
մշակելու եւ կիրառելու համար եւ կգործի իբրեւ խորհրդակցական
խորհուրդ Ազգային Ժողովի, համապատասխան պետական մարմինների,
մարզային իշխանութիւնների, հասարակական կազմակերպութիւնների
համար:
ԵԱՀԿ գրասենեակը աջակցել է 1998թ. Օրհուսի կոնվենցիայի
Հայաստանում կիրառման գործում` տեղեկատուութեան մատչելիություն,
հանրային մասնակցութիւն եւ արդարադատութեան մատչելիություն
բնապահպանական խնդիրների վերաբերեալ:
Ըստ ԵԱՀԿ երեւանեան գրասենեակի մամլոյ հաղորդագրութեան, նոր
գիտաուսումնական կենտրոնը կհամագործակցի Օրհուս կենտրոնների հետ`
բնապահպանական խնդիրների կարգաւորման ուղղութեամբ մարզային եւ
պետական մակարդակով: Նշւում է, որ 2002թ.-ից ԵԱՀԿ աջակցութեամբ
Հայաստանում բացուել է ինը Օրհուս կենտրոն: