ՀՀ-ՈՒՄ ԳՐԱՆՑՈՒԱԾ ԱՌԵՎՏՐԱՅԻՆ ԻՐԱՒԱԲԱՆԱԿԱՆ ԱՆՁԱՆՑ ԹԻՒԸ ՄԷԿ
ՏԱՐՈՒՄ ԱՃԵԼ Է 5%-ՈՎ, ԻՍԿ ԱՆՀԱՏ ՁԵՌՆԱՐԿԱՏԷՐԵՐԻՆԸ` 33,19%-ՈՎ
05-06-2008 20:00:00 | Հայաստան | Տնտեսութիւն
ԵՐԵՎԱՆ, 5 ՅՈՒՆԻՍԻ, ՆՈՅԵԱՆ ՏԱՊԱՆ: ՀՀ Արդարադատութեան
նախարարութեան Իրաւաբանական անձանց եւ անհատ ձեռնարկատէրերի
պետական ռեգիստրի գործակալութեան տուեալներով, 2008թ.-ին
յունուար-ապրիլին գրանցուել են 1 հազ. 199 առեւտրային իրաւաբանական
անձինք եւ 5 հազ. 24 անհատ ձեռնարկատէրեր, որոնց ընդհանուր թիւը
2008թ.-ի մայիսի 1-ի դրութեամբ կազմել է, համապատասխանաբար, 57
հազ. 452 եւ 55 հազ. 535: ՀՀ Ազգային վիճակագրական ծառայութեան
տուեալներով, 2007թ.-ի մայիսի 1-ի դրութեամբ գրանցուած են եղել 54
հազ. 730 իրաւաբանական անձինք եւ 41 հազ. 695 անհատ ձեռնարկատէրեր:
Մէկ տարուայ ընթացքում իրաւաբանական անձանց թիւն աճել է 5%-ով, իսկ
անհատ ձեռնարկատէրերինը` 33,19%-ով:
2008թ.-ի յունուար-ապրիլին լուծարուել են 290 իրաւաբանական
անձինք եւ 533 անհատ ձեռնարկատէրեր:
2008թ.-ի յունուար-ապրիլին գրանցուած 1 հազ. 199 իրաւաբանական
անձինք կատարել են 8 մլրդ 699,05 մլն դրամի (մօտ 28 մլն 216,2 հազ.
ԱՄՆ դոլար) ներդրումներ: Օտարերկրեայ ներդրումներով հիմնուած 112
ձեռնարկութիւններում կատարուել են 7 մլրդ 48,04 մլն դրամի
ներդրումներ, որոնցից միայն օտարերկրեայ իրաւաբանական անձանց եւ
քաղաքացիների կողմից հիմնադրուած 62 ձեռնարկութիւններում` 6 մլրդ
942,91 մլն դրամի, իսկ 50 համատեղ ձեռնարկութիւններում` 105,13
մլն դրամի ներդրումներ: