ՀՀ ԿԲ-Ն ՎԵՐԱՖԻՆԱՆՍԱՒՈՐՄԱՆ ՏՈԿՈՍԱԴՐՈՒՅՔԸ ԲԱՐՁՐԱՑՐԵԼ Է
0,25%-ՈՎ` ՍԱՀՄԱՆԵԼՈՎ ԱՅՆ 7%
03-06-2008 20:00:00 | Հայաստան | Տնտեսութիւն
ԵՐԵՎԱՆ, 3 ՅՈՒՆԻՍԻ, ՆՈՅԵԱՆ ՏԱՊԱՆ: 2008թ.-ի յունիսի 3-ի
նիստում ՀՀ Կենտրոնական բանկի խորհուրդը վերաֆինանսաւորման
տոկոսադրույքը բարձրացրել է 0,25%-ով` սահմանելով այն 7%:
Ինչպէս «ՆՈՅԵԱՆ ՏԱՊԱՆ»-ին յայտնեցին ՀՀ ԿԲ-ի մամուլի
ծառայութիւնից, 2008թ.-ի մայիսին ապրիլի նկատմամբ արձանագրուել է
1,3% գնաճ, որի պարագայում 12-ամսեայ գնաճը կազմել է 9,9%: Թէեւ այն
0,8%-ով նուազել է 2007թ.-ի ապրիլ - 2008թ.-ի ապրիլ
ժամանակահատուածում արձանագրուած գնաճի մակարդակից, 12-ամսեայ գնաճը
շարունակում է գերազանցել նպատակային թիրախի վերին սահմանը
4,4%-ով:
ՀՀ ԿԲ-ի խորհուրդը արձանագրել է, որ չնայած արտաքին
միջավայրից եկող գնաճային ճնշումների թուլացման միտումների
առկայութեանը, որն արտայայտուել է պարենային ապրանքների,
մասնաւորապէս հացահատիկի եւ բրնձի միջազգային գների նուազմամբ,
նավթամթերքի գները շարունակում են բարձր մնալ` պահպանելով աճի
պոտենցիալը: Լրացուցիչ գնաճային ռիսկեր են պարունակում նաեւ
համախառն պահանջարկի սպասւող աճի տեմպերը եւ արտաքին գնաճային
ճնշումների դեռեւս շարունակւող երկրորդային ազդեցութիւնների
դրսեւորումները:
Կարեւորելով գնաճային սպասումների մեղմման եւ նպատակային
թիրախից շեղումների նուազեցման խնդիրները, ԿԲ-ի խորհուրդն
արձանագրել է, որ ԿԲ-ի վերաֆինանսաւորման տոկոսադրույքի յետագայ
ճշգրտումը պայմանաւորուած է լինելու առաջիկայ ամիսներին
համաշխարհային շուկաներում պարենային ապրանքների գների վերոնշեալ
միտումներին ներքին գների արձագանքման արագութեամբ եւ չափով: