ԿԻԵՎ, 20 ՄԱՅԻՍԻ, ՆՈՅԵԱՆ ՏԱՊԱՆ: Կիեւում Վերակառուցման եւ
զարգացման եւրոպական բանկի (ՎԶԵԲ) ամենամեայ 17-րդ նիստում
Գերմանիայի նախկին պետական քարտուղար Թոմաս Միրովը ընտրուել է այդ
կազմակերպութեան նոր նախագահ: Նա այդ պաշտօնում կփոխարինի Ժան
Լեմիերին, որն իր պաշտօնը կթողնի յուլիսի 1-ին: Լեմիէրը չորրորդ
նախագահն է ՎԶԵԲ-ի պատմութեան մէջ, որն այդ պաշտօնը զբաղեցնում էր
ութ տարի:
ՎԶԵԲ-ը ստեղծուեց նախկին սոցիալիստական բլոկի երկրներին
ժողովրդավարութեան եւ մասնաւոր հատուածի զարգացման գործում
աջակցութիւն ցուցաբերելու նպատակով: Կիեւում նիստի ժամանակ
քննարկուել է նաեւ Թուրքիայի դիմումը, որպէսզի դառնայ ՎԶԵԲ-ի
գործառնութիւնների երկիր: Ինչպէս լրագրողներին յայտնել է Ժան
Լեմիէրը, բանկի Կառավարիչների խորհրդի անդամների մեծ մասը այդ
խնդրանքին դրականօրէն է վերաբերւում, եւ ամենայն հաւանականութեամբ,
այն վերջնականապէս կլուծուի այս տարուայ աշնանը:
2008թ. ՎԶԵԲ-ը 353 նախագծի համար յատկացրել է 5,6 մլրդ.
եւրոյի վարկ, որից 77,8 մլն. յատկացուել է Հայաստանին:
ՎԶԵԲ-ի ֆինանսավորած նախագծերի հնարաւոր էկոլոգիական եւ
սոցիալական հետեւանքների համար բանկի պատասխանատւութեան մասին
«ՆՏ»-ի թղթակցի հարցին Ժան Լեմիէրը պատասխանեց. «Ես համաձայն եմ
ձեզ հետ: Բանկի շատ նախագծերում կան էկոլոգիական եւ սոցիալական
ռիսկեր: Մենք այդ հարցին մեծ ուշադրութիւն ենք դարձնում
միջազգային չափորոշիչներին նախագծերի համապատասխանութիւնը
ուսումնասիրելիս: Համարում եմ, որ ռիսկերի դէմ պայքարել կարելի է
աւելի բարձր չափորոշիչների ներդրմամբ, ընդ որում ոչ միայն իր
համար, այլեւ տարածաշրջանում միւս ներդրողների համար»: