ՀՀ ԱԺ-Ն ՁԵՌՆԱՄՈՒԽ ԵՂԱՎ 2007 ԹՈՒԱԿԱՆԻ ՊԵՏԲԻՒՋԷԻ ԿԱՏԱՐՄԱՆ
ՏԱՐԵԿԱՆ ՀԱՇՈՒԵՏՒՈՒԹԵԱՆ ՔՆՆԱՐԿՄԱՆԸ
20-05-2008 19:00:00 | Հայաստան | Տնտեսութիւն
ԵՐԵՎԱՆ, 20 ՄԱՅԻՍԻ, ՆՈՅԵԱՆ ՏԱՊԱՆ: ՀՀ Ազգային ժողովը մայիսի
20-ին ձեռնամուխ եղավ 2007թ. պետական բիւջէի կատարման տարեկան
հաշուետւութեան քննարկմանը:
Ինչպէս նշեց ՀՀ ֆինանսների փոխնախարար, գլխաւոր գանձապետ Ատոմ
Ջանջուղազյանը, 2007թ. արձանագրուել է 13,8 տոկոս տնտեսական աճ,
ինչը 4,8 տոկոսով գերազանցում է ծրագրային ցուցանիշը: 1 շնչին
ընկնող ՀՆԱ-ն կազմել է 975 907 դրամ անուանական
արտայայտութեամբ` 2006թ. համեմատ աճելով շուրջ 18 տոկոսով:
2007թ. գործազրկութեան պաշտօնական մակարդակը նախորդ տարուայ
նկատմամբ կրճատուել է շուրջ 0,4 տոկոսով` կազմելով 7,1 տոկոս: Որպէս
գործազուրկ գրանցուած են եղել 82 800 մարդ: Բնակչութեան տարեկան
եկամուտները 2006թ. համեմատ աճել են 25,7 տոկոսով, միջին
աշխատավարձը` 21,2 տոկոսով` կազմելով 77 469 դրամ:
2007-ի դեկտեմբերին ԱՄՆ դոլարի նկատմամբ հայկական արժոյթի
անուանական հաշուարկային փոխարժեքը կազմել է 304,1 դրամ` նախորդ
տարուայ դեկտեմբերի համեմատ արժեւորվելով 16,6 տոկոսով: Ըստ մաքսային
վիճակագրութեան, ՀՀ արտաքին ապրանքաշրջանառությունը կազմել է 4,439
մլրդ ԱՄՆ դոլար, ինչը 2006-ի համեմատ աճել է 39,7 տոկոսով: 2007թ.
արտահանումն աճել է 17,5 տոկոսով, ներմուծումը` 40,7 տոկոսով: