2007 Թ.-ԻՆ ԱՐՁԱՆԱԳՐՈՒԱԾ ՏՆՏԵՍԱԿԱՆ ԱՃԸ ԾՐԱԳՐՈՒԱԾԻՑ ՄՕՏ 5%-ՈՎ
ԱՒԵԼԻ Է
12-05-2008 18:00:00 | Հայաստան | Տնտեսութիւն
ԵՐԵՎԱՆ, 12 ՄԱՅԻՍԻ, ՆՈՅԵԱՆ ՏԱՊԱՆ: Հայաստանում 2007թ.-ին
արձանագրուած 13,7% տնտեսական աճը ծրագրուածից աւելի է 4,7%-ով, իսկ
2006թ.-ից ցուցիանիշից` 0,4%-ով: Նոյն տարում ՀՆԱ-ն կազմել է 3
տրիլիոն 139,4 մլրդ դրամ (մօտ 917,7 մլրդ ԱՄՆ դոլար), իսկ 1 շնչին
ՀՆԱ-ի բաժինը` 973,2 հազար դրամ` նախորդ տարուայ համեմատ աճելով
18%-ով: Այս մասին ՀՀ Ազգային Ժողովի մշտական յանձնաժողովների
համատեղ նիստում տեղեկացրեց ֆինանսների նախարարի տեղակալ, ՀՀ
գանձապետ Ատոմ Ջանջուղազյանը:
Ըստ նրա, 2007թ.-ի տնտեսական աճի շուրջ 8,5%-ը պայմանաւորուած
է եղել կապիտալ շինարարութեան եւ ծառայութիւնների ծաւալների աճով:
Ընդ որում, շինարարութիւնում ստեղծուած ՀՆԱ-ն 2007թ.-ին աճել է
18,4%-ով:
2007թ.-ին գործազրկութեան մակարդակը կրճատուել է 0,4%-ով`
կազմելով տնտեսապես ակտիւ բնակչութեան 7,1%-ը, կամ 82,8 հազար
մարդ: 2007թ.-ին բնակչութեան դրամական եկամուտները եւ ծախսերն աճել
են, համապատասխանաբար, 25,7%-ով եւ 23,6%-ով: Միջին աշխատավարձն
աճել է 21,2%-ով` կազմելով 77,4 հազար դրամ:
2007թ.-ին ընթացիկ հաշուի բացասական մնացորդը կազմել է մօտ
571,4 մլն ԱՄՆ դոլար` նախորդ տարուայ համեմատ աճելով 454, 2 մլն
դոլարով: Արտաքին ապրանքաշրջանառությունը կազմել է 4 մլրդ 439,2
մլն դոլար, նախորդ տարուայ համեմատ աճելով 39,7%-ով, ընդ որում
արտահանումն աճել է 17,5%-ով, իսկ ներմուծումը` 49,7%-ով: