ԵՐԵՎԱՆ, 22 ՄԱՐՏԻ, ՆՈՅԵԱՆ ՏԱՊԱՆ: «Դինո Գոլդ Մայնինգ
Քամփնի»-ն («DENO GOLD MINING COMPANY», Կապանի նախկին
լեռնահարստացման կոմբինատ), որի 95%-ի սեփականատէրն է հանդիսանում
«Դանդի Փրեշզ Մեթալզ» կանադական ընկերութիւնը, շարունակելով
արտադրութեան արդիականացման աշխատանքները` սկսել է նաեւ
կառուցուածքային բարեփոխումների իրականացում: Կառուցուածքային
բարեփոխումները իրականացուելու են 2008թ.-ի ընթացքում: Դրանց
նպատակն է` Կապանի հանքերը եւ «Դինո Գոլդ Մայնինգ Քամփնի»-ի
ընդհանուր գործունէութիւնը համապատասխանեցնել համաշխարհային
բարձրագոյն ստանդարտներին: Ծրագրի իրականացման ընթացքում
ընկերութիւնը մտադիր է Կապանում եւ մերձակայ շրջաններում ներդնել
մի քանի տասնեակ միլիոն ԱՄՆ դոլար: Յիշեցնենք, որ ընկերութիւնն
արդէն 30 միլիոն ԱՄՆ դոլարի չափով ներդրում է կատարել:
Ինչպէս 2007թ. նոյեմբերին Հայաստան կատարած իր այցի ընթացքում
յայտարարել էր Ջոնաթան Գուդմանը, որը հանդիսանում է «Դանդի Փրեշզ
Մեթալզ» ընկերութեան նախագահը եւ սեփականատերը, ներդրումների
ընդհանուր գումարը կարող է հասնել մինչեւ 300 մլն դոլարի, եթէ
ընկերութիւնը հաստատի հետախուզութեան համար լիցենզավորված հանքերի
պոտենցիալը:
Որպէս ընկերութեան արդիականացման եւ ներդրումների աճի առաջին
քայլ` իրականացուեց պայթուցիկ նիւթերի պատրաստման արտադրամասի
ուսումնասիրութիւնը: Յայտնաբերուել են արտադրամասի` միջազգային
չափանիշներին չհամապատասխանող պայմաններ, որոնք սպառնում են
աշխատակիցների անվտանգութեանը եւ կեանքին:
«Լինելով սոցիալապէս պատասխանատու ընկերութիւն եւ գիտակցելով
աշխատողների համար առողջ եւ անվտանգ աշխատանքային միջավայր
ապահովելու իր պարտաւորութիւնը, ընկերութիւնը որոշում է կայացրել
փակել արտադրամասը եւ այսուհետ օգտագործել աւելի անվտանգ եւ
տնտեսապես մատչելի արտադրանք»,- յայտարարել է Կապանի հանքի գլխաւոր
տնօրէն Ռոբերտ Ֆալետան:
Ինչպէս «ՆՈՅԵԱՆ ՏԱՊԱՆ»-ին յայտնեցին ընկերութեան գրասենեակից,
պայթուցիկ նիւթերի պատրաստման արտադրամասի բոլոր 28 աշխատակիցները
այդ որոշման մասին ծանուցուել են սահմանուած կարգով: Ընկերութիւնը
երաշխավորում է, որ նրանք կստանան ՀՀ Աշխատանքային օրենսդրութեամբ
սահմանուած փոխհատուցումները եւ նպաստները: Ընկերութիւնը
պաշտօնապէս յայտարարել է աշխատողներին, որ հնարաւորութիւնների
սահմաններում կարուի ամէն ինչ` վերջիններիս ԴԳՄՔ-ում այլ աշխատանքի
տեղավորելու համար: Այս խնդիրը արդէն իսկ քննարկւում է արտադրամասի
աշխատողների հետ:
Նշենք, որ ըստ «ՆՏ»-ի թղթակցի, արտադրամասի 28 աշխատակիցներ
մարտի 20-ի երեկոյեան բողոքի ցոյց էին կազմակերպել Կապանի
քաղաքապետարանի դիմաց: Նրանք հաւաստիացնում էին, որ առանց նախօրոք
զգուշացնելու ու ծանուցագրի Ռ.Ֆալետան յայտարարել է, որ մայիսի
1-ից արտադրամասը չի գործելու եւ աշխատակիցները ազատուելու են
աշխատանքից: