ԵՐԵՎԱՆ, 17 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանում 2008թ.-ի
յունուար-սեպտեմբերին վարձակալված 33794,04 հա հողերից 52,56 հա-ն
վարձակալվել են Երեւանում: Ինչպէս հոկտեմբերի 17-ի ասուլիսում
յայտնեց ՀՀ Անշարժ գոյքի կադաստրի պետական կոմիտէի նախագահ Մանուկ
Վարդանեանը, նոյն ժամանակահատուածում անշարժ գոյքի նկատմամբ
իրականացուած 20 402 գրաւադրման գործարքները կազմել են անշարժ
գոյքի նկատմամբ իրաւունքների պետական գրանցումների 17,3%-ը: Ըստ
նրա, գրաւադրման գործարքներից ծագող իրաւունքների պետական
գրանցումների թիւը 2007թ.-ի նոյն ժամանակահատուածի համեմատ աճել է
16,8%-ով:
Գրաւադրման գործարքների 46,9%-ը իրականացուել են բազմաբնակարան
բնակելի շէնքերի բնակարանների, 27,2%-ը` առանձնատների, 12,6%-ը
հողերի, 9,5%-ը` հասարակական նշանակութեան օբյեկտների նկատմամբ:
Մ.Վարդանեանը նշեց նաեւ, որ 2008թ.-ի ինն ամիսներին
հանրապետութիւնում իրականացուել են հիփոթեքային գրաւադրման 2 074
գործարքներ, որից 1338-ը` Երեւանում: Ընդ որում, հիփոթեքային
գրաւադրման գործարքներից 67,8%-ը իրականացուել են բազմաբնակարան
բնակելի շէնքերի բնակարանների, 23,2%-ը` անհատական բնակելի տների,
4,1%-ը` հասարակական նշանակութեան օբյեկտների, 0,4%-ը` արտադրական
նշանակութեան օբյեկտների, 1,4%-ը` ամառանոցների, 0,7%-ը`
աւտոտնակների եւ 2,3%-ը` հողերի նկատմամբ:
Նոյն ժամանակահատուածում հանրապետութիւնում արձանագրուել են
անշարժ գոյքի սեփականութեան իրաւունքի 19 503 առաջնային
գրանցումներ առանց գործարքների, որոնց թիւը 2007թ.-ի նոյն
ժամանակահատուածի համեմատ աճել է 8,6%-ով: Առաջնային գրանցումների
տեսակարար կշիռն անշարժ գոյքի նկատմամբ իրաւունքների պետական
գրանցումներում կազմել է 16,6%: Առաջնային գրանցումների թուի
ամենաբարձր (31,6%) տոկոսաչափն արձանագրուել է Երեւանում: