ԵՐԵՒԱՆՈՒՄ ՏԵՂԻ ԿՈՒՆԵՆԱՅ ՊԱՐԱՅԻՆ ՖԻԼՄԵՐԻ ՎԵՐԱԲԵՐԵԱԼ ՍԵՄԻՆԱՐ,
ՈՐԸ ԿԸ ՎԱՐԵՆ ԱՐՏԱՍԱՀՄԱՆՑԻ ՅԱՅՏՆԻ ՄԱՍՆԱԳԷՏՆԵՐ
09-10-2008 19:00:00 | Հայաստան | Մշակոյթ
ԵՐԵՎԱՆ, 9 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: «Հայֆեստ» միջազգային
6-րդ կինոփառատօնի օրերին Երեւանում կանցկացուի եռօրյա
տարածաշրջանային սեմինար` «Պարային ֆիլմերի համագործակցութիւն»
խորագրով, որին կմասնակցեն 5 հայ, 2-ական վրացի եւ թուրք
արուեստագէտներ:
Ինչպէս հոկտեմբերի 9-ին մամլոյ ասուլիսում նշեց Հայաստանի
ազգային պատկերասրահի կինոբաժնի պատասխանատու, ծրագրի ղեկավար
Մելիք Կարապետեանը, կինոպարի ժանրը աշխարհում լայն ճանաչում ունի,
իսկ Հայաստանում այն նոր է սկսել զարգանալ: Այս սեմինարի ընթացքում
արուեստագէտներին կդասաւանդեն այդ ասպարէզի ամենայայտնի ռեժիսորներ`
բրիտանացի Դեվիդ Հինթոնը եւ ամերիկացի Ալլա Կովգանը: Մասնակիցները
եռօրյա ժամկէտում կպատրաստվեն, կը գրեն սցենարներ, որոնց հիման վրայ
կը նկարահանուեն 3-9-րոպէանոց ֆիլմեր, որոնք կցուցադրուեն դեկտեմբերի
12-13-ը Երեւանում կայանալիք Կինոպար փառատոնի օրերին:
Անցեալ տարի փառատոնի շրջանակներում Հայաստան ժամանած Ալլա
Կովգանը այստեղ սկսել է համագործակցել ռեժիսոր Մկրտիչ Մալխասեանի
հետ: Մասնաւորապէս սկսուել են նկարահանումներ Փելեշյանի ֆիլմերի
հետքերով: Բացի այդ, Ալլա Կովգանը ֆիլմ է նկարել Դեվիդ Հինթոնի եւ
Մ. Մալխասեանի հետ համատեղ Աֆրիկայում պարուհի Նորայի մասին: Նրա
խօսքերով, այս համագործակցութիւնը շատ արդիւնաւէտ է եղել, եւ
առաջիկայում իրենք կփորձեն համագործակցել նաեւ այլ ծրագրի
շրջանակում:
Հոկտեմբերի 10-ին «Մոսկուա» կինոթատրոնում կկայանայ «Նորա»
ֆիլմի երեւանեան պրեմիերան:
Նշենք, որ Դեվիդ Հինթոնը պարային ֆիլմերի ամենայայտնի
ռեժիսորներից է, պարային ֆիլմերի ակադեմիայի հիմնադիրը: Հոկտեմբերի
10-11-ը «Մոսկուա» կինոթատրոնում կկայանայ նրա յայտնի գործերի
հետահայաց ցուցադրությունը: Հանդիսատեսը հնարաւորութիւն կունենայ
տեսնել բեմական գլուխգործոցների էկրանավորված տարբերակները: