ՀԱՆԴՈՒՐԺՈՂԱԿԱՆՈՒԹԵԱՆ ՄԹՆՈԼՈՐՏ ԱԿՆԿԱԼՈՂ ՀԱՍԱՐԱԿՈՒԹԻՒՆԸ
ԱԿԱՆԱՏԵՍՆ Է ԴԱՌՆՈՒՄ ԱԶԱՏ ԽՕՍՔԻ ՀԱՆԴԷՊ ԲՌՆՈՒԹԻՒՆՆԵՐԻ ՆՈՐ ԱԼԻՔԻ,-
ՅԱՅՏԱՐԱՐՈՒՄ ԵՆ ՄԻ ՇԱՐՔ ՀԿ-ՆԵՐ
21-08-2008 18:24:00 | Հայաստան | Մարդու իրաւունքներ
ԵՐԵՎԱՆ, 21 ՕԳՈՍՏՈՍԻ, ՆՈՅԵԱՆ ՏԱՊԱՆ: Ըստ հայաստանեան մի շարք
հասարակական կազմակերպութիւնների օգոստոսի 21-ի յայտարարութեյան,
2008թ.-ի օգոստոս ամիսը աննախադէպ էր լրատվամիջոցների
ներկայացուցիչների նկատմամբ բռնութիւններով: Յայտարարութիւնում
ըստ ժամանակագրութեան յիշատակուած են այդ բռնութիւնների փաստերը.
Օգոստոսի 1-ին Աշտարակ քաղաքում բերման է ենթարկուել եւ մօտ
մէկուկէս ժամ ոստիկանական բաժանմունքում պահուել «Հայկական ժամանակ»
օրաթերթի տնտեսական հարցերով պատասխանատու Գագիկ Հովակիմեանը, որը
խմբագության մեքենայով Աշտարակ էր տարել լրագրող Աննա Զախարյանին`
լուսաբանելու քաղաքի իրավիճակը (մասնաւորապէս` տրանսպորտի
չաշխատելը) ընդդիմութեան նախատեսած հանրահաւաքի օրը: Լրատվամիջոցի
աշխատակցի նկատմամբ ապօրինի բռնութիւն իրականացրած ոստիկանները
մինչ այժմ պատասխանատւութեան չեն ենթարկուել` չնայած խմբագրութեան
պահանջներին:
Օգոստոսի 5-ին Ֆոտոլրագրող Գագիկ Շամշեանը, որը ցանկանում էր
լուսանկարել «Հանրապետութիւն» կուսակցութեան քաղխորհրդի անդամ
Սմբատ Այվազեանի դէմ դատաքննութիւնը, Երեւանի Կենտրոն եւ
Նորք-Մարաշ համայնքների ընդհանուր իրաւասութեան դատարանի դատաւոր
Գագիկ Աւետիսեանի կարգադրութեամբ մի քանի ժամ անցկացրել է
անազատութեան մէջ. նա արգելանքի տակ է պահուել դատարանի նկուղային
հարկում, այնուհետեւ նրան տեղափոխել են ոստիկանութեան Կենտրոնի
բաժին:
Օգոստոսի 6-ին նոյն դատավարութիւնը լուսաբանող «Չորրորդ
իշխանութիւն» թերթի լրագրող Գոհար Վեզիրյանը դատաւորի հրահանգով
բռնութեան է ենթարկուել դատական կարգադրիչների կողմից. վերջիններս
Վեզիրյանին քաշքշելով եւ հարուածելով տեղափոխել են դատարանում
գտնուող ամբաստանեալների պահման սենեակ: Այստեղ լրագրողին տարբեր
հանցագործությունների մէջ մեղադրւողների հետ միեւնոյն սենեակում
են պահել մօտ մէկուկէս ժամ, որից յետոյ տեղափոխել են ոստիկանութեան
Կենտրոնի բաժին:
Օգոստոսի 11-ին տնից դուրս գալուց յետոյ ծեծի է ենթարկուել
«Հայկական ժամանակ» օրաթերթի լրագրող Լուսինէ Բարսեղեանը: Վերջինս
տեղափոխուել է «Սուրբ Գրիգոր Լուսաւորիչ» բժշկական կենտրոն, որտեղ
ենթարկուել է բժշկական հետազօտութեան: Բժիշկները նրա մօտ արձանագրել
են գլխի սալջարդ եւ հեմատոմա: Թէեւ յարուցուել է քրէական գործ,
սակայն յանցագործները մինչ այժմ յայտնաբերուած չեն:
Իսկ օգոստոսի 18-ի երեկոյեան Երեւանի կենտրոնում յարձակման եւ
ծեծի է ենթարկուել «Ազատութիւն» ռադիոկայանի Երեւանեան գրասենեակի
ղեկավարի պաշտօնակատար Հրաչ Մելքումեանը:
«Այսպիսով, 2008 թուականի մարտի 1-ի ողբերգական
իրադարձութիւններից յետոյ հանդուրժողականութեան մթնոլորտ ակնկալող
հասարակութիւնը ականատեսն է դառնում ազատ խօսքի հանդէպ
բռնութիւնների նոր ալիքի: Սա տեղի է ունենում այն դէպքում, երբ
ակնկալւում էր, որ Հայաստանի Հանրապետութիւնը պէտք է քայլեր
ձեռնարկի հնարավորինս արագ իրականացնելու ԵԽԽՎ 1609
(«Ժողովրդավարական ինստիտուտների գործառոյթը Հայաստանում») եւ
1620 («Վեհաժողովի 1609 (2008) բանաձեւի կատարումը Հայաստանի
կողմից») բանաձեւերը, որոնք ենթադրում են բարեփոխումներ նաեւ խօսքի
ազատութեան ոլորտում»,- ասուած է Երեւանի մամուլի ակումբի, Խօսքի
ազատութեան պաշտպանութեան կոմիտէի, Բազմակողմանի տեղեկատուութեան
ինստիտուտի, Թրանսփարենսի Ինթերնեշնլ հակակոռուպցիոն կենտրոնի,
Հելսինկեան քաղաքացիական ասամբլէայի Վանաձորի գրասենեակի, Վանաձորի
մամուլի ակումբի եւ Ժուռնալիստների «Ասպարէզ» ակումբի
յայտարարութիւնում:
Նրան մտահոգութիվւն են յայտնել, որ ոչ միայն պահպանւում է ՀՀ
իշխանութիւնների աւանդական դարձած անգործութիւնը, այլեւ որ
դատական ու իրավապահ մարմինների պաշտօնեաներն են դառնում
լրագրողների օրինական մասնագիտական գործունէութիւնը
խոչընդոտողներ:
«Մամուլի նկատմամբ բռնութիւններն արդէն վտանգաւոր
սահմանագծին են հասել, եւ իշխանութիւնների ներկայացուցիչները պէտք
է ոչ թէ վերացական մտահոգութիւններ հայտնեն եւ կոչեր անեն, այլ
արդիւնաւէտ քայլեր ձեռնարկեն, որպէսզի բռնութիւններ ու
ապօրինութիւններ իրականացրած բոլոր անձինք հայտնաբերվեն եւ, անկախ
զբաղեցրած պաշտօնից, պատժվեն օրէնքի ողջ խստութեամբ»,- նշում են
յայտարարութեյան հեղինակները: