ԵՒՐՈՊԱԿԱՆ ՅԱՆՁՆԱԽՈՒՄԲԸ ՇԱՐՈՒՆԱԿՈՒՄ Է ՀԵՏԵՒԵԼ ՀԱՅԱՍՏԱՆՈՒՄ
ՄԱՐԴՈՒ ԻՐԱՒՈՒՆՔՆԵՐԻ ՈԼՈՐՏՈՒՄ ԸՆԹԱՑՈՂ ԶԱՐԳԱՑՈՒՄՆԵՐԻՆ
01-07-2008 21:24:00 | Հայաստան | Մարդու իրաւունքներ
ԵՐԵՎԱՆ, 1 ՅՈՒԼԻՍԻ, ՆՈՅԵԱՆ ՏԱՊԱՆ: Նախագահական
ընտրութիւններից յետոյ Հայաստանում ստեղծուած ներքաղաքական
իրավիճակը շարունակում է քննարկման առարկայ մնալ, եւ Եւրոպական
Հանձնախումբն ուշի ուշով հետեւում է մարդու իրաւունքների ոլորտում
ընթացող զարգացումներին: Այս մասին ասուած է Եւրոմիութեան արտաքին
յարաբերութիւնների ու Եւրոպական հարեւանութեան քաղաքականութեան
հարցերով յանձնակատար Բենիտա Ֆերերո-Վալդների նամակում` ուղղուած
ՆԺԿ վարչութեանը:
Հանձնակատարը նշում է, որ մարդու իրաւունքների պաշտպանութեանն
ու հիմնարար ազատութիւններին առնչուող հարցերը միշտ էլ օրակարգային
գլխաւոր թեմաներն են հանդիսանում Հայաստանի իշխանութիւնների հետ
հանդիպումների ժամանակ:
«Մեր վերջին հանդիպումների ժամանակ Եւրոպական Հանձնախումբն
արդէն իսկ յստակ ուղերձ է յղել Հայաստանի իշխանութիւններին`
նշելով մարդու իրաւունքների եւ հիմնարար ազատութիւնների ոլորտում
բարեփոխումները շարունակելու անհրաժեշտութիւնը, եւ այդ
համատեքստում բարձրացրել է քաղաքական հայեացքների ու իրաւունքների
համար կալանաւորուած ակտիւիստների խնդիրը»,- ասուած է
Բ.Ֆերերո-Վալդների յունիսի 25-ով թուագրուած նամակում:
Նա նաեւ նշել է, որ Եւրոպական Յանձնախումբը հետեւողականօրէն
շարունակելու է պնդել իր հարցադրումները, ինչպէս նաեւ աջակցել
Հայաստանին` քաղաքական եւ տնտեսական բարեփոխումներ իրականացնելու
գործում: