ՀՀ ՆԱԽԱԳԱՀԸ ԱՅՑԵԼԵՑ ՆԿԱՐԻՉՆԵՐԻ ՄԻՈՒԹԵԱՆ ՆՈՐԱԲԱՑ ՇԷՆՔԸ
28-06-2008 17:36:00 | Հայաստան | Մշակոյթ
ԵՐԵՎԱՆ, 28 ՅՈՒՆԻՍԻ, ՆՈՅԵԱՆ ՏԱՊԱՆ: ՀՀ նախագահ Սերժ Սարգսեանը
յունիսի 28-ին այցելեց ՀՀ նկարիչների միութեան նորաբաց շէնքը,
դիտեց ցուցասրահներում ներկայացուած գործերը, ապա միութեան
պատասխանատուների հետ քննարկեց ոլորտին առնչուող խնդիրները:
Ինչպէս լրագրողների հետ զրոյցում նշեց Միութեան նախագահ
Կարեն Աղամեանը, Նկարիչների միութեան տունը շուրջ 2 տարի փակ էր
այցելուների համար. ժամանակակից պահանջներին համապատասխանող
ցուցասրահները բացուել են օրերս: Շէնքի եւ ցուցասրահների բացումը,
ըստ նրա, մեծ հետաքրքրութիւն առաջացրեց հանրութեան շրջանում`
բացմանը ներկայ են եղել աննախադէպ թւով` 5000-6000, մարդ:
Նկարիչների միութեան 75-ամեակին նուիրուած յոբելեանական
ցուցահանդեսին մասնակցում են միութեան բոլոր 600 անդամները:
Կ.Աղամեանը նշեց, որ Միութիւնը մօտ ապագայում մտադիր է
ցուցասրահներում կազմակերպել միջազգային ցուցահանդեսներ,
բիենալեներ` տարածաշրջանի, գուցէեւ աւելի հեռաւոր երկրներից
ժամանած նկարիչների մասնակցութեամբ: