ԲՐԻՒՍԷԼ, 20 ՅՈՒՆԻՍԻ, ՆՈՅԵԱՆ ՏԱՊԱՆ: Բրիւսէլում Եւրամիութեան գագաթնաժողովում որոշում է ընդունուել պաշտօնապէս չեղեալ յայտարարել դիւանագիտական պատժամիջոցները Կուբայի նկատմամբ: Այս մասին, ինչպե սհաղորդում է «Ինտերֆաքսը», յայտարարել է ԵՄ արտաքին քաղաքականութեան եւ անվտանգութեան հարցերի գերագոյն յանձնակատար Խավիեր Սոլանայի մամլոյ քարտուղար Քրիստինա Գալլախը: Դիւանագիտական պատժամիջոցները, որ սահմանափակում էին ԵՄ բարձրաստիճան ներկայացուցիչների այցերը Կուբա, սահմանուել էին 2003 թուականին ի նշան բողոքի Կուբայում մարդու իրաւունքների վիճակի դէմ: Երկու տարի անց արդէն պատժամիջոցները կասեցվեցին, եւ դրանց այս անգամ չեղեալ յայտարարելը պէտք է ընկալել որպէս խորհրդանշական քայլ, որը, ըստ Գալլախի, «կոչուած է խրախուսելու կուբացի առաջնորդ Ռաուլ Կաստրոյին, որ վերջերս է ընդունել կառավարման ղեկը իր եղբայր Ֆիդելից, հասնելու առաջընթացի մարդու իրաւունքների բնագաւառում»:

---