ԱՄՆ-Ի ԿՈՆԳՐԵՍԸ ԲՈՒՇԻ ԻՄՊԻՉՄԵՆՏԻ ԲԱՆԱՁԵՎՆ ՈՒՂԱՐԿԵԼ Է
ԻՐԱՒԱԲԱՆԱԿԱՆ ՅԱՆՁՆԱԺՈՂՈՎ
12-06-2008 16:10:00 | ԱՄՆ | Միջազգային
ՎԱՇԻՆԳՏՈՆ, 12 ՅՈՒՆԻՍԻ, ՆՈՅԵԱՆ ՏԱՊԱՆ: ԱՄՆ-ի Կոնգրեսի
Ներկայացուցիչների պալատը չորեքշաբթի 251 «կողմ» եւ 166 «դէմ»
ձայնով որոշել է յետագայ քննարկման համար նախագահ Ջորջ Բուշի
իմպիչմենտի մասին բանաձեւն ուղարկել պալատի իրաւաբանական
յանձնաժողով, հաղորդում է «Նովոստի» գործակալութիւնը:
Իրաւաբանական յանձնաժողովի ղեկավար, դեմոկրատ կոնգրեսական Ջոն
Կոնիերսը առայժմ որեւէ ձեւով չի մեկնաբանել պալատի որոշումը եւ չի
յայտնել, թէ իր գլխաւորած յանձնաժողովը արդեօք քննարկելու է այդ
փաստաթուղթը:
Նախօրէին ամերիկեան Կոնգրեսի Ներկայացուցիչների պալատի
դեմոկրատ խօսնակ Նենսի Փելոսիի անունից նրա մամլոյ քարտուղար Նադիմ
Էլշամին յայտարարել էր, որ Կոնգրեսը հաւանութիւն չի տայ իմպիչմենտի
բանաձեւին:
Յիշեցնենք, որ յայտնի դեմոկրատ-կոնգրեսական եւ ԱՄՆ-ի նախագահի
նախկին թեկնածու Դեննիս Կուսինիչը ԱՄՆ-ի Կոնգրեսի
Ներկայացուցիչների պալատի նիստում բանաձեւի նախագիծ էր
ներկայացրել, որով պահանջւում է իմպիչմենտի ենթարկել ԱՄՆ-ի նախագահ
Ջորջ Բուշին 35 կետերով:
«Նախագահ Ջորջ Բուշը մեղաւոր է այնպիսի խախտումներում, որոնք
պատժվում են իմպիչմենտով, եւ արժանի է պաշտօնանկման»,- յայտարարել
էր կոնգրեսականը:
Մեղադրանքները, որ Բուշի դէմ Կուսինիչն առաջադրել է,
շարադրուած են «իմպիչմենտի 35 յօդուածներում»: Առաջին յօդուվածում
կոնգրեսականը Բուշին մեղադրում է այն բանում, որ ԱՄՆ-ի նախագահը
Պենտագոնի ղեկավարի հետ իրականացրել է «գաղտնի քարոզարշավ Իրաքի
հետ պատերազմի անհրաժեշտութեան արհեստական հիմնավորման համար»:
Բուշին հասցէագրուած մեղադրանքները ներառում են նաեւ
խոշտանգումների կիրառում կալանաւորուած անձանց նկատմամբ,
կալանաւորուած անձանց այլ երկրների կառավարութիւններին յանձնելու
գաղտնի ծրագրի իրականացում, Իրանի կողմից սպառնալիքների մասին
ԱՄՆ-ի ժողովրդին եւ Կոնգրեսին մոլորեցում, «միջամտութիւն ազատ եւ
արդար ընտրութիւնների գործընթացին եւ արդարադատութեան գործընթացի
կոռումպացում» եւ այլն: