ՅԱՍՄԻԿ ՊՈՂՍՅԱՆ. ՄՇԱԿՈՅԹԻ ՆԱԽԱՐԱՐՈՒԹԻՒՆԸ ԱՌԱՋԻԿԱՅ ՄԷԿ ԱՄՍՈՒԱՅ
ԸՆԹԱՑՔՈՒՄ ԿՅԱՅՏԱՐԱՐԻ ԿԱԴՐԱՅԻՆ ՄՐՑՈՅԹՆԵՐ ՏԱՐԲԵՐ ՊԱՇՏՕՆՆԵՐԻ ՀԱՄԱՐ
26-05-2008 19:00:00 | Հայաստան | Մշակոյթ
ԵՐԵՎԱՆ, 26 ՄԱՅԻՍԻ, ՀԱՅԵՐՆ ԱՅՍՕՐ-ՆՈՅԵԱՆ ՏԱՊԱՆ: ՀՀ մշակոյթի
նախարար Յասմիկ Պողոսեանը մայիսի 26-ին հրաւիրած մամլոյ ասուլիսում
լրագրողներին ներկայացրեց նախարարութեան 2008-12 թուականների
մշակոյթային ծրագրերի երեք հիմնական ուղղութիւնները, որոնք, ըստ
նախարարի, առաջնային կարեւորութիւն ունեն երկրի մշակոյթային
խնդիրների լուծման ու զարգացման համար:
Նախարար Յասմիկ Պողոսեանի խօսքերով, առաջին եւ կարեւագույն
ուղղութիւնը մշակոյթի դաշտի համաչափ զարգացումն է, մշակոյթի
ապակենտրոնացումը` մայրաքաղաքից դէպի մարզերը: Այս առումով, ըստ
նրա, արդէն 2007 թուականին ՀՀ կառավարութեան կողմից ընդունուած եւ
մեկնարկած Հայաստանի մարզերի մշակոյթի զարգացման եռամյա ծրագրի
շրջանակներում որոշակի աշխատանքներ են կատարուել: Ծրագրի աւարտից
կէս տարի առաջ կկատարուի մոնիտորինգ, որի արդիւնքների հիման վրայ էլ
կմշակուեն յաջորդ` 2010-12թթ. մշակոյթային ծրագրերը:
Միւս ուղղութիւնը, ինչպէս նշեց նախարարը, մշակոյթային
ժառանգութեան պահպանման եւ տարածման ուղղությունն է, ինչը կարեւոր
է սերունդների ազգային կրթութեան եւ դաստիարակութեան համար: Յասմիկ
Պողոսեանը հաւաստիացրեց, որ այս ուղղութիւնը կարեւոր է նաեւ
նրանով, որ այն ի մի կբերի արտերկրում եղած մշակոյթային արժէքները
եւ կհամակարգի ամբողջութեամբ:
3-րդ կարեւագույն ուղղութիւնը, նախարարի
խօսքերով, ժամանակակից արուեստների զարգացումն է, ինչի համար
անհրաժեշտ է կատարել ընդարձակ մոնիտորինգ կադրերի գծով եւ
ուժեղացնել մշակոյթային հաստատութիւնների նիւթատեխնիկական բազան:
Ասուլիսի ընթացքում Հ.Պողոսեանը անդրադարձաւ նախարարութեան
կառուցուածքային փոփոխությանը, ըստ որի, առաջիկայ մէկ ամսուայ
ընթացքում գերատեսչութիւնը կյայտարարի կադրային մրցոյթներ այս
կամ այն պաշտօնի համար: «Նախարարութեանը հարկաւոր են մշակոյթային
կադրեր, որոնք նորովի եւ խելամիտ ծարագրերով ու աշխատանքներով
արդիւնաւէտ կդարձնեն գերատեսչութեան աշխատանքները»,- նշեց նա: Ըստ
Հ.Պողոսեանի, ենթադրւում են կադրային փոփոխութիւններ իր ղեկավարած
գերատեսչութիւնում: