ԵՐԵՎԱՆ, 12 ՄԱՅԻՍԻ, ՆՈՅԵԱՆ ՏԱՊԱՆ: Կոմիտասի անուան պետական
կոնսերուատորիայի երեք սաներից բաղկացած «Արսիկա» տրիոն մայիսի
սկզբին համերգներով հանդէս կգայ Կոմիտասի անուան կամերային
երաժշտութեան տանը: Ինչպէս «ՆՈՅԵԱՆ ՏԱՊԱՆ»-ի թղթակցին յայտնեց
տրիոյի ղեկավար, կոնսերուատորիայի դասախօս եւ դաշնակահար Արմինէ
Գրիգորեանը, նուագախումբը, որի անդամները նվագում են դաշնամուր,
ջութակ եւ թավջութակ, կներկայացնի ռուս կոմպոզիտորների
ստեղծագործությունները:
Տրիոն գործում է դեռեւս 1999 թուականից, սակայն նոր կազմով այն
հանդէս է գալիս 2005 թուականից: «Նուագախումբը հիմնականում համերգներ
է ունենում հանրապետութեան մարզերում` նպատակ ունենալով դասական
երաժշտությանը հաղորդակից դարձնել նաեւ շրջանների բնակիչներին»,-
ասաց նա:
Ա.Գրիգորեանի խօսքով, նուագախումբն այցերի ժամանակ յաճախ
վարպետութեան դասեր է անցկացնում մարզերի երաժշտական
ուսումնարաններում, ինչի արդիւնքում մարզերի առաւել շնորհալի եւ
տաղանդաւոր երիտասարդներից շատերը երբեմն հրաւիրւում եւ մասնակցում
են քաղաքային համերգներին: Ա.Գրիգորեանի խօսքով, սա եւս մէկ
հնարաւորութիւն է համերգների եւ այցերի միջոցով բացայայտելու
տաղանդաւոր երեխաներին` միաժամանակ պրոպագանդելով դասական
երաժշտութիւնը մարզերում: