ՀԱՅԱՍՏԱՆՈՒՄ ՆԱԽԱՏԵՍՒՈՒՄ Է ՆԵՐԴՆԵԼ ՖԻՆԱՆՍԱԿԱՆ ՀԱՄԱԿԱՐԳԻ
ՀԱՇՏԱՐԱՐԻ ԻՆՍՏԻՏՈՒՏԸ
13-02-2008 20:00:00 | Հայաստան | Տնտեսութիւն
ԵՐԵՎԱՆ, 13 ՓԵՏՐՈՒԱՐԻ, ՆՈՅԵԱՆ ՏԱՊԱՆ: ՀՀ կառավարութեան
փետրուարի 13-ի նիստում հաւանութեան են արժանացել «Սպառողական
կրեդիտավորման մասին», «Ֆինանսական համակարգի հաշտարարի մասին» եւ
«Բանկային աւանդների ներգրաւման մասին» ՀՀ օրէնքների նախագծերը:
Ինչպէս նիստից յետոյ լրագրողներին տեղեկացրեց ՀՀ կենտրոնական բանկի
նախագահ Տիգրան Սարգսեանը, օրինագծերի ընդունման հիմնական նպատակը
ՀՀ քաղաքացիների շահերի պաշտպանութիւնն է:
Տ.Սարգսեյանի պարզաբանմամբ, «Սպառողական կրեդիտավորման մասին»
օրինագծի համաձայն սպառողին պէտք է հասանելի լինի տուեալ ֆինանսական
հաստատութեան կողմից տրամադրուող ծառայութեան մասին ողջ
տեղեկատուութիւնը, յստակ եւ սպառիչ ներկայացուի մատուցւող
ծառայութեան գինը: Ըստ ԿԲ-ի նախագահի, բանկը պարտաւորւում է նաեւ
յաճախորդին ամէն ամիս տեղեակ պահել իր ստանձնած
պարտաւորութիւնների չիրականացման դէպքում սպասուվելիք տույժերի եւ
տուգանքների մասին:
Տ.Սարգսեանը նշեց, որ «Ֆինանսական համակարգի հաշտարարի մասին»
օրինագծով նախատեսւում է ստեղծել ֆինանսական հաշտարարի ինստիտուտ,
որի նպատակն է արագ եւ անվճար քննարկել յաճախորդների կողմից
առեւտրային բանկերի գործունէութեան վերաբերեալ ստացուած դիմումները
եւ բողոքները: Ֆինանսական հաշտարարը պէտք է անմիջապէս արձագանքի
այդ դիմումներին եւ արագ որոշումներ կայացնի դրանց լուծման
ուղղութեամբ: Դրանով, ըստ Տ.Սարգսեյանի, ակնկալւում է մեծացնել
սպառողների վստահութիւնը բանկային համակարգի աշխատանքի նկատմամբ:
«Բանկային աւանդների ներգրաւման մասին» օրինագծով լրացուցիչ
պարտականութիւն է դրւում բանկերի վրայ` ամէն ամիս իրենց
աւանդատուներին անվճար տեղեկատուութիւն տրամադրել նրանց աւանդների
հաշիւների վերաբերեալ: Այս օրինագծով հստակեցվել եւ կանոնակարգուել
են նաեւ բանկային յաճախորդների սպասարկման կանոնները: