ԱՅՍ ՏԱՐԻ ԳԻՒՂԱՏՆՏԵՍՈՒԹԵԱՆ ԶԱՐԳԱՑՄԱՆ ՀԱՄԱՐ ՀՀ ՊԵՏԲԻՒՋԷԻՑ
ՍՈՒԲՍԻԴԻԱՆԵՐ ԿՅԱՏԿԱՑՈՒԵՆ ԱՒԵԼԻ ՔԱՆ 100 ՀԱԶԱՐ ՇԱՀԱՌՈՒՆԵՐԻ
07-02-2008 21:30:00 | Հայաստան | Տնտեսութիւն
ԵՐԵՎԱՆ, 7 ՓԵՏՐՈՒԱՐԻ, ՆՈՅԵԱՆ ՏԱՊԱՆ: ՀՀ կառավարութեան փետրուարի
7-ի նիստում հաստատուել է գիւղատնտեսական հողօգտագործողներին
պետական աջակցութեան կարգը: Այն մշակtyել է ՀՀ 2008թ. պետական
բիւջէով նախատեսուած` ՀՀ մարզերում սուբսիդաւորման ծրագրի
իրականացումն արդիւնաւէտ, համակարգուած եւ թափանցիկ կազմակերպելու
նպատակով, հաշուի առնելով նաեւ գիւղատնտեսական արտադրութեան
առանձնահատկությունները: Սահմանուել է, որ 1 հեկտար մշակովի
հողատարածքի հաշւով (ցանքեր եւ բազմամեայ տնկարկներ) պետական
աջակցութեան գումարը 2008թ.-ի համար կազմում է 35000 դրամ: Ընդ
որում, 7 հա-ից աւելիի դէպքում գումար չի յատկացուելու: Կարգի
ընդունումը կնպաստի սուբսիդաւորման գործընթացի նկատմամբ
մոնիտորինգի անցկացմանը, գյուղատնտեսությունում սուբսիդաւորման
գործուն համակարգի ներդրմանը:
Ինչպէս նիստից յետոյ լրագրողներին յայտնեց ՀՀ
գիւղատնտեսութեան փոխնախարար Սամուէլ Աւետիսեանը, դեռեւս անցած
տարի հանրապետութիւնում իրականացուել է գիւղատնտեսութեան ոլորտի
աջակցմանն ուղղուած փորձնական ծրագիր: Դրանով ՀՀ պետբիւջէից, որպէս
սուբսիդիա, մօտ 200 մլն դրամ (մօտ 655 հազար ԱՄՆ դոլար) է
յատկացուել Արագածոտնի եւ Գեղարքունիքի մարզերի ընդհանուր առմամբ 16
համայնքների: Ծրագրից օգտուել են 5 հազար հա ընդհանուր մակերեսով
հողատարածութիւն ունեցող 2300 շահառուներ:
Ս.Աւետիսեանը տեղեկացրեց, որ որոշմամբ այս տարի գրեթէ 7 անգամ
աւելանում է յատկացուելիք գումարի չափը` կազմելով 1 մլրդ 645 մլն
դրամ: Այն կընդգրկի աւելի քան 60 հազար հա տարածութիւն եւ աւելի
քան 100 հազար շահառուների:
Անդրադառնալով 2009թ.-ի յունվարի 1-ից գիւղմթերքների` ԱԱՀ-ով
հարկմանը, Ս.Աւետիսեանը նշեց, որ հայկական կողմը առաջարկել է
մինչեւ 8 մլն դրամ հասոյթ ունեցող տնտեսութեանը չհարկել, իսկ
Համաշխարհային բանկը` մինչեւ 20 մլն դրամ: Վերջինի դէպքում, ըստ
փոխնախարարի, ԱԱՀ-ով կհարկուի հանրապետութեան գիւղմթերքների
արտադրութեամբ զբաղվողների ընդամէնը 1%-ը: