«ԳԱԶՊՐՈՄԲԱՆԿ»-Ի ՆՄԱՆ ԽՈՇՈՐ ՖԻՆԱՆՍԱԿԱՆ ԿԱՌՈՅՑՆԵՐԻ ՀԵՏ
ՀԱՄԱԳՈՐԾԱԿՑՈՒԹԻՒՆԸ ՀՀ ԿԱՌԱՎԱՐՈՒԹԵԱՆ ՏՆՏԵՍԱԿԱՆ ՔԱՂԱՔԱԿԱՆՈՒԹԵԱՆ
ԳԵՐԱԿԱՅՈՒԹԻՒՆՆԵՐԻՑ Է
25-01-2008 20:00:00 | Հայաստան | Տնտեսութիւն
ԵՐԵՎԱՆ, 25 ՅՈՒՆՎԱՐԻ, ՆՈՅԵԱՆ ՏԱՊԱՆ: Ռուսաստանի բանկային
համակարգում առաջատար դիրք գրաւող «Գազպրոմբանկ»-ի մուտքը
Հայաստանի ֆինանսական շուկայ նոր խթան կհանդիսանայ բանկային եւ
ֆինանսական ոլորտներում երկու երկրների միջեւ համագործակցութեան
զարգացման գործում: Ընդունելով յունվարի 25-ին «Գազպրոմբանկ» ԲԲԸ-ի
կառավարման խորհրդի նախագահ Անդրեյ Ակիմովի գլխաւորած
պատուիրակութեանը, այս մասին յայտարարել է ՀՀ վարչապետ Սերժ
Սարգսեանը: Նա նշել է, որ «Գազպրոմբանկ»-ի նման խոշոր ու
հեղինակաւոր ֆինանսական կառոյցների հետ փոխշահավետ
համագործակցութիւնը ՀՀ կառավարութեան տնտեսական քաղաքականութեան
գերակայ ուղղութիւններից է: Վարչապետը հաւաստիացրել է, որ
Հայաստանը ջանում է տարէցտարի աւելի հրապուրիչ դարձնել գործարար
միջավայրը խոշոր ներդրումների համար, քայլեր է ձեռնարկում
օրենսդրական դաշտի կատարելագործման ուղղութեամբ: Ս.Սարգսեանն
ընդգծել է, որ դրան նպաստում են նաեւ վերջին տարիների կայուն
տնտեսական աճը, Հայաստանի տնտեսութեան մէջ ներդրումների աճող
ծաւալները:
Հայաստանի հետ իր ղեկավարած ընկերութեան համագործակցութիւնը
համարելով գրաւիչ ու հեռանկարային, Ա.Ակիմովը վստահեցրել է, որ
«Գազպրոմբանկ»-ի մուտքը Հայաստան նպատակաուղղուած կլինի նաեւ
հանրապետութեան բանկային ու ֆինանսական համակարգի զարգացմանը: Ըստ
նրա, Հայաստանի հետ համագործակցութեան ու ներդրումների համար լաւ
հնարաւորութիւններ կան տնտեսութեան տարբեր ճիւղերում,
մասնաւորապէս` էներգետիկայի ոլորտում, ինչին նպաստում է նաեւ առկայ
մարդկային մեծ ներուժը:
Ինչպէս «ՆՈՅԵԱՆ ՏԱՊԱՆ»-ին յայտնեցին ՀՀ կառավարութեան
Տեղեկատուութեան եւ հասարակայնութեան հետ կապերի վարչութիւնից,
հանդիպման աւարտին Ս.Սարգսեանը նշել է, որ ՀՀ կառավարութիւնը
պատրաստ է քննարկել փոխշահավետ համագործակցութեան զարգացմանն
ուղղուած ցանկացած առաջարկ եւ նախաձեռնութիւն, իրաւասութեան եւ
հնարաւորութիւնների սահմաններում նաեւ աջակցել դրանց իրագործմանը: