2008 Թ.-Ի ՊԵՏԲԻՒՋԷԻ ՆԱԽԱԳԾՈՎ ՆԱԽԱՏԵՍՒՈՒՄ Է ԴԱՏԱԽԱԶՆԵՐԻ
ՄԻՋԻՆ ԱՇԽԱՏԱՎԱՐՁԻ ՉԱՓԸ 147 ՀԱԶԱՐ ԴՐԱՄԻՑ ԲԱՐՁՐԱՑՆԵԼ ՄԻՆՉԵՒ 375
ՀԱԶԱՐ ԴՐԱՄԸ
30-10-2007 19:00:00 | Հայաստան | Տնտեսութիւն
ԵՐԵՎԱՆ, 30 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: ՀՀ 2008թ.-ի պետական
բիւջէի նախագծով պետական կառավարման մարմինների պահպանման ծախսերի
ընդհանուր գումարը ծրագրաւորուած է շուրջ 44,3 մլրդ դրամ, ինչը
2007թ.-ի համեմատ 0,9 տոկոսով աւելի է: Այս մասին ՀՀ Ազգային
Ժողովի մշտական յանձնաժողովների հոկտեմբերի 30-ի համատեղ նիստում
յայտնեց ՀՀ ֆինանսների եւ էկոնոմիկայի փոխնախարար Պաւել Սաֆարեանը:
Ըստ նրա, ընթացիկ տարուայ համեմատ ծախսերի աճը հիմնականում
պայմանաւորուած է դատական համակարգի, դատախազութեան, ինչպէս նաեւ
պետական կառավարման առանձին մարմինների կառուցուածքային
փոփոխություններով եւ պետական կառավարման մարմիններում աշխատողների
աշխատավարձերի բարձրացմամբ: Պետական կառավարման մարմինների
պահպանման ընդհանուր ծախսերի կէսից աւելին` շուրջ 24,8 մլրդ դրամը,
2008-ին նախատեսուած է ուղղել աշխատավարձի ֆոնդին: 2008-ին պետական
կառավարման ապարատի աշխատողների միջին աշխատավարձը կկազմի 127 491
դրամ` 2007թ.-ի 116,7 հազար դրամի դիմաց, քաղծառայողներինը` 123
հազար դրամ` 106 հազար դրամի դիմաց, ԱԳՆ-ում աշխատող
դիվանագետներինը` 200 հազար դրամ` 161 հազար դրամի դիմաց,
դատախազութեան համակարգում` 245 հազար դրամ` 119 հազար դրամի
դիմաց, ընդ որում դատախազների միջին աշխատավարձը կկազմի 375 հազար
դրամ` 2007թ.-ի 147 հազար դրամի դիմաց (մօտ 445 ԱՄՆ դոլար):