ԵՐԵՒԱՆՈՒՄ ՄԵԿՆԱՐԿԵՑ «ՀԱՅՖԵՍՏ» 5-ՐԴ ՄԻՋԱԶԳԱՅԻՆ ԹԱՏԵՐԱԿԱՆ
ՓԱՌԱՏՈՆԸ
04-10-2007 19:35:00 | Հայաստան | Մշակոյթ
ԵՐԵՎԱՆ, 4 ՀՈԿՏԵՄԲԵՐԻ, ՆՈՅԵԱՆ ՏԱՊԱՆ: Հայաստանեան «Լուչիա»
թատերախմբի «Քենթրվիլյան ուրուականը» ներկայացումով հոկտեմբերի 4-ին
Երեւանում մեկնարկեց «հայֆեստ» 5-րդ միջազգային թատերական
փառատոնը, որի բացմանը յաջորդեց նաեւ թատերական շքերթն ու
հրավառութիւնը` Շառլ Ազնաւուրի հրապարակում: Փառատոնի նախագահ
Արթուր Ղուկասեանի խօսքերով, հոկտեմբերի 4-14-ը անցկացուող այս
փառատոնի օրերին կցուցադրուեն շուրջ 100 ներկայացում 33 երկրների
թատերախմբերի կողմից: Աւանդական դարձած այս թատերական փառատօնին
կմասնակցեն հայաստանեան 17 թատրոններ: Թատերախմբերը հանդէս կգան
երեւանեան բոլոր բեմահարթակներում եւ բաց հրապարակներում:
«5 տարի առաջ փառատոնը հիմնադրուեց որպէս թատերական, սակայն
յետագայում դարձաւ կատարողական արուեստների փառատոն: Մենք փորձեցինք
ընդլայնել փառատոնի շրջանակները` ընդգրկելով արուեստի միւս
ասպարէզներում ստեղծուած նոր ու հետաքրքիր գործերը, որոնք եւս
թատրոն են իրենց ձեւի մէջ»,- նշեց փառատոնի նախագահը:
Արթուր Ղուկասեանը յայտնեց, որ երեւանեան թատերական փառատօնին
ներկայ կգտնուեն հանրաճանաչ արուեստագէտներ, միջազգային փառատոների
նախագահներ, թատերագետներ, որոնք տեղում կանցկացնեն սեմինարներ եւ
«կլոր սեղաններ»` նուիրուած Հայաստանում մշակոյթային
քաղաքականութեանը եւ արտմենեջմենթին:
Ըստ Ա.Ղուկասեանի, փառատոնը հայ հանդիսատեսին հնարաւորութիւն
կընձեռի դիտել տարբեր երկրների մնջախաղի, դրամատիկական,
տիկնիկային, խամաճիկների, ինչպէս նաեւ ժամանակակից պարի թատրոնների
լաւագոյն ներկայացումները: Նշուեց, որ «հայֆեստ»-ի շրջանակներում
կկազմակերպուի նաեւ Տիկնիկային եւ մանկական թատրոնների փառատոն:
Իսպանական «Ֆիրա Տարեգա» թատերական փառատոնի նախագահ Մայք
Ռիբալտան նշեց, որ ինքն ուրախութեամբ է մասնակցում այս երիտասարդ
փառատօնին եւ ակնկալում է ոչ միայն տեսնել հետաքրքիր
ներկայացումներ, այլեւ` սովորել: Մայք Ռիբալտան, ով երեք օրով է
եկել Հայաստան, փորձելու է օգնել երիտասարդ ու տաղանդաւոր
դերասաններին ու հետաքրքիր թատերախմբերին. «Չեմ եկել միայն դիտելու
լաւ, վատ կամ միջին ներկայացումներ, այլ ուզում եմ օգնել
երիտասարդներին, որպէսզի իրենց ուժերը փորձեն նաեւ դրսում»: