ԵՐԵՒԱՆԻ ՔԱՂԱՔԱՊԵՏԱՐԱՆԸ ԱՌԱՋԱՐԿՈՒՄ Է ԱՐԳԵԼԵԼ ԲԱԶՄԱԲՆԱԿԱՐԱՆ
ՇԷՆՔԵՐԻ ՆԿՈՒՂՆԵՐՈՒՄ ՏԵՂԱԿԱՅՈՒԱԾ ԳԻՇԵՐԱՅԻՆ ՕԲՅԵԿՏՆԵՐԻ
ԳՈՐԾՈՒՆԷՈՒԹԻՒՆԸ
17-09-2007 19:50:00 | Հայաստան | Հասարակութիւն
ԵՐԵՎԱՆ, 17 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Երեւանում անցկացուող
ամէնօրեայ ստուգումների արդիւնքում հասարակական սննդի 28
օբյեկտներում արձանագրուել են խախտումներ, մասնաւորապէս,
երաժշտութեան սահմանուած բարձրութեան գերազանցում: Ինչպէս
սեպտեմբերի 17-ի ասուլիսում յայտնեց Երեւանի քաղաքապետարանի
Առեւտրի եւ սպասարկումների վարչութեան պետ Կարեն Գեւորգեանը,
ստուգումներն անցկացուել են հիմնականում բնակիչների ահազանգերի
հիման վրայ: Ըստ նրա, նշուած օբյեկտների սեփականատէրերի նկատմամբ
կիրառուել են վարչական տույժեր` 30-50 հազ. դրամի (մօտ 88-147 ԱՄՆ
դոլար) սահմաններում:
Կ.Գեւորգեանը նշեց, որ քաղաքապետարանը բնակչութիւնից
բազմաթիւ բողոքներ է ստանում հիմնականում բնակելի շէնքերի
նկուղներում տեղակայուած զվարճանքի օբյեկտների վերաբերեալ: Ըստ նրա,
բնակիչների բողոքները հիմնականում արդարացի են, քանի որ շէնքերի
նկուղներում նման օբյեկտների գործունէութիւնը օրէնքով արգելուած է:
Նշուեց, որ քաղաքապետարանը բոլոր համայնքների ղեկավարներին
յանձնարարել վերանայել բազմաբնակարան շէնքերի առաջին հարկերում,
ինչպէս նաեւ նկուղներում տեղակայուած գիշերային ակումբների եւ
զվարճանքի օբյեկտներին տրուած թույլտվությունները:
Ըստ Կ.Գեւորգեանի, քաղաքապետարանի համապատասխան վարչութիւնը
պատրաստւում է դիմել ՀՀ Առեւտրի եւ տնտեսական զարգացման
նախարարութեանը առաջարկութեամբ` մշակել համապատասխան կարգ, ըստ որի
բազմաբնակարան շէնքերում տեղակայուած նման օբյեկտների
գործունէութիւնը ընդհանրապես չթոյլատրուի: