ՍԵՊՏԵՄԲԵՐԻ 11-15-ԻՆ ԼՂՀ-ՈՒՄ ԿԿԱՅԱՆԱՅ «ԱՐՑԱԽԵԱՆ ԱՌԱՋԻՆ
ՓԱՌԱՏՈՆ»` ՆՈՒԻՐՈՒԱԾ ՇՈՒՇԻԻ ԱԶԱՏԱԳՐՄԱՆ 15-ԱՄԵԱԿԻՆ
06-09-2007 20:42:00 | Հայաստան | Մշակոյթ
ԵՐԵՎԱՆ, 6 ՍԵՊՏԵՄԲԵՐԻ, ՆՈՅԵԱՆ ՏԱՊԱՆ: Հայաստանի պետական
կամերային նուագախմբի նախաձեռնութեամբ սեպտեմբերի 11-15-ին Լեռնային
Ղարաբաղում կանցկացուի «Արցախեան առաջին փառատոն»` նուիրուած Շուշիի
ազատագրման 15-ամեակին: Ինչպէս սեպտեմբերի 6-ի ասուլիսում յայտնեց
նուագախմբի գեղարուեստական ղեկավար եւ դիրիժոր Արամ Ղարաբէկեանը,
փառատոնի ժամանակ կկատարուեն հայ եւ օտարազգի կոմպոզիտորների
լաւագոյն գործերը:
Փառատոնի շրջանակում կամերային նուագախումբն ու երգչախումբը
համերգներով հանդէս կգան Ստեփանակերտում, Շուշիում, Մարտակերտում,
Գանձասարում եւ Վանք գիւղում: Իսկ սեպտեմբերի 15-ին Ստեփանակերտի
Վերածննդի հրապարակում կայանալիք գալա-համերգին կմասնակցեն նաեւ
Արցախի պետական կամերային երգչախումբն ու նուագախումբը, ինչպէս նաեւ
զինուորական փողային նուագախումբը: Նշուեց, որ փառատոնի հովանաւորն է
ՀՀ Մշակոյթի նախարարութիւնը:
Անդրադառնալով հայ երգարվեստի ներկայիս վիճակին,
Ա.Ղարաբէկեանը նշեց, որ այդ բնագաւառում քաոս է տիրում եւ արժէքներ
չկան: «Երբ լսում ես մեր այսօրուայ էստրադային երգիչներին, կամ
ինչպէս իրենք են իրենց անուանում` «աստղերին», ապա տեսնում ես, որ
նրանց մասնակցութեամբ համերգները նման են հարսանեկան
խնջոյքների»,- ասաց Ա.Ղարաբէկեանը: Ըստ նրա, անընդունելի է, որ
Ալ.Սպենդիարեանի անուան օպերայի եւ բալետի ազգային ակադեմիական
թատրոնն ու «Արամ Խաչատրեան» համերգասրահը տրամադրւում է «ում
պատահի», քանզի «այդ բեմերը միմիայն պրոֆեսիոնալների համար են»: