ՀՀ ԿԱՌԱՎԱՐՈՒԹԻՒՆԸ ԼՐԱՑՈՒՄ Է ԿԱՏԱՐԵԼ ՄԱՐԴԱՏԱՐ-ՏԱՔՍԻ
ԱՎՏՈՄՈԲԻԼՆԵՐՈՎ ՈՒՂԵՎՈՐԱՓՈԽԱԴՐՈՒՄՆԵՐԻ ԿԱԶՄԱԿԵՐՊՄԱՆ ԼԻՑԵՆԶԱՒՈՐՄԱՆ
ԿԱՐԳՈՒՄ
02-08-2007 20:00:00 | Հայաստան | Տնտեսութիւն
ԵՐԵՎԱՆ, 2 ՕԳՈՍՏՈՍԻ, ՆՈՅԵԱՆ ՏԱՊԱՆ: Մինչ ՀՀ կառավարութեան
օգոստոսի 2-ի նիստի օրակարգի հարցերին անցնելը, վարչապետ Սերժ
Սարգսեանը յանձնարարել է կառավարութեան նիստում քննարկվող հարցերը
նախապատրաստող բոլոր պատասխանատուներին այսուհետ այդ փաստաթղթերին
կցվող տեղեկանք-հիմնավորումներում անպայման ներառել որոշման
կայացման նպատակը, ակնկալուող արդիւնքները եւ հնարաւոր
բարդութիւնները, որպէսզի որոշում կայացնելիս կառավարութիւնն այդ
ամէնը նկատի առնի:
Չընդունելով հապճեպ եւ համակողմանի չուսումնասիրված
որոշումների նախագծեր կառավարութեան քննարկմանը ներկայացնելու
գործելաոճը, վարչապետը իբրեւ օրինակ բերել է ՀՀ կառավարութեան
2007թ. մարտի 22-ի «ՀՀ-ում մարդատար-տաքսի ավտոմոբիլներով
ուղեւորափոխադրումների կազմակերպման լիցենզաւորման կարգը եւ
լիցենզիայի ձեւը հաստատելու մասին» N 655-Ն որոշումը, որի
արդիւնքում միանգամից մի քանի հազար մարդ այլեւս չի կարող զբաղուել
մինչ այդ իրականացրած գործունէութեամբ: Ըստ Ս.Սարգսեյանի, բոլոր
որոշումների դէպքում, յատկապէս` տնտեսութեանը, գործարարութեանը
վերաբերող, պէտք է մշտապէս ղեկավարվել այն տրամաբանությամբ, որ
խաղի կանոնները փոխվելու պարագայում նախապէս անհրաժեշտ է
տեղեկացնել եւ որոշակի ժամկէտ տալ այդ գործընթացի մասնակիցներին,
ինչպէս սովորաբար արւում է հարկերի դրոյքաչափերի փոփոխութեան
դէպքում, որն ամրագրուած է նաեւ օրէնքով:
Ինչպէս «ՆՈՅԵԱՆ ՏԱՊԱՆ»-ին յայտնեցին ՀՀ կառավարութեան
Տեղեկատուութեան եւ հասարակայնութեան հետ կապերի վարչութիւնից,
նիստում լրացում է կատարուել «ՀՀ-ում մարդատար-տաքսի ավտոմոբիլներով
ուղեւորափոխադրումների կազմակերպման լիցենզաւորման կարգը եւ
լիցենզիայի ձեւը հաստատելու մասին» N 655-Ն որոշման մէջ: Ըստ այդմ,
մինչեւ 2008թ. ապրիլի 1-ը ՀՀ-ում մարդատար-տաքսի ավտոմոբիլներով
ուղեւորափոխադրումների կազմակերպման գործունէութիւն իրականացնող
իրաւաբանական անձինք եւ անհատ ձեռնարկատէրերը նշուած որոշմամբ
հաստատուած կարգին համապատասխան պէտք է ստանան լիցենզիաներ եւ
ներդիր (ներդիրներ):