ՖՐԱՆՍԻԱՆ ԵՎ ԼԻԲԻԱՆ ՊԱՅՄԱՆԱՒՈՐՈՒԵԼ ԵՆ «ԽԱՂԱՂ ԱՏՈՄԻ»
ՕԳՏԱԳՈՐԾՄԱՆ ՄԱՍԻՆ
26-07-2007 17:25:00 | | Միջազգային
ՏՐԻՊՈԼԻ, 26 ՅՈՒԼԻՍԻ, ՆՈՅԵԱՆ ՏԱՊԱՆ: Ֆրանսիան եւ Լիբիան
յուշագիր են ստորագրել ատոմային էներգիայի խաղաղ օգտագործման
ոլորտում համագործակցութեան մասին, որը, մասնաւորապէս, ենթադրում է
միջուկային ռեակտորի մատակարարում Լիբիա ծովային ջրի աղազերծման
համար:
Ինչպէս հաղորդում է Քաթարի «Ալ-Ջազիրա» արբանեակային
հեռուստաալիքը, փաստաթուղթը ստորագրուել է Տրիպոլիում Ֆրանսիայի
նախագահ Նիկոլա Սարկոզիի այցի արդիւնքում, որի ժամանակ նա
հանդիպում է ունեցել Լիբիայի առաջնորդ Մուամար Քադաֆիի հետ:
Յուլիսի 25-ի երեկոյեան համաձայնագիրը ստորագրել են Ֆրանսիայի եւ
Լիբիայի արտաքին գործերի նախարարները` Բեռնար Քուշները եւ
Աբդեռահման Շալգամը, հաղորդում է «Ֆրանս-ինֆո» ռադիոկայանը:
Դրանից բացի, ֆրանս-լիբիական գագաթնաժողովի արդիւնքում
ստորագրուել է համաձայնագիր ռազմատեխնիկական ոլորտում
համագործակցութեան մասին, որն «ուղղուած է երկու երկրների, ինչպէս
նաեւ Միջերկրականի եւ Աֆրիկայի անվտանգութեան ամրապնդմանը»:
Փաստաթուղթը նախատեսում է տեղեկատուութեան փոխանակում Լիբիայի եւ
Ֆրանսիայի միջեւ, երկու երկրների փորձագէտների այցելութիւններ:
Փաստաթղթի համաձայն, Փարիզը եւ Տրիպոլին քննարկում են նաեւ
սպառազինութիւնների արտադրութեան համատեղ ձեռնարկութիւնների
ստեղծման հնարաւորութիւնը: