ՌՈՒՍԱՍՏԱՆԸ ԵՎ ԻՏԱԼԻԱՆ ԿԱՄԵՆՈՒՄ ԵՆ ԳԱԶԱՏԱՐ ԿԱՌՈՒՑԵԼ
25-06-2007 19:50:00 | | Միջազգային
ՀՌՈՄ, 25 ՅՈՒՆԻՍԻ, ՆՈՅԵԱՆ ՏԱՊԱՆ: Իտալական ENI պետական
նավթագազային ընկերութիւնը եւ «Գազպրոմը» ծրագրում են նոր գազատար
կառուցել Սեւ ծովի հատակով: Համապատասխան յուշագիրը յունիսի 23-ին
Հռոմում ստորագրել են ENI-ի գլխաւոր կառավարիչ Պաոլո Սկարոնին եւ
«Գազպրոմի« վարչութեան նախագահի տեղակալ Ալեքսանդր Մեդվեդեւը:
Ինչպէս մամլոյ ասուլիսում յայտնել է Սկարոնին,
900-կիլոմետրանոց «Հարաւ-եւրոպական գազատարը» պէտք է անցնի ծովի
հատակով 2000 մետր խորության վրայ, հասնի Բուլղարիա, իսկ այնտեղ
բաժանուի երկու ճիւղի, որոնցից մէկը կգնա դէպի Իտալիայի հարաւ, իսկ
միւսը` Աուստրիա եւ Սլովենիա:
Նախագիծը դեռ պէտք է համաձայնեցուի միւս շահագրգիռ երկրների
հետ: Բուն շինարարութիւնը, ըստ Սկարոնիի, ծրագրւում է աւարտել
երեք տարում: Գործընկերները ծախսերը հաւասարապէս կկիսեն:
Յուշագրի ստորագրմանը ներկայ էին Ռուսաստանի արդիւնաբերութեան
եւ էներգետիկայի նախարար Վիկտոր Խրիստենկօն եւ Իտալիայի տնտեսական
զարգացման նախարար Պիերլուիջի Բերսանին, որոնք այդ առթիւ հանդէս են
եկել համատեղ յայտարարութեամբ:
Իտալիայի բնական գազի շուկան մեծութեամբ երրորդն է Եվրոպայում
բրիտանական եւ գերմանական շուկաներից յետոյ: Էներգետիկ հաշվեկշռում
գազի Իտալիայի մասնաբաժինը կազմում է մօտ մէկ երրորդը, ընդ որում
պահանջարկի 86%-ը փակվում է ներմուծման հաշուին: Հիմնական
մատակարարներն են Ալժիրը եւ Ռուսաստանը: