ԵՐԵՎԱՆ, 15 ՅՈՒՆԻՍԻ, ՆՈՅԵԱՆ ՏԱՊԱՆ: Հայ օգնութեան ֆոնդի (ՀՕՖ) «Ճանապարհորդութիւն դէպի Հայաստան» ծրագրով 23-40 տարեկան ամերիկահայ մասնագէտներից կազմուած 12 հոգանոց հերթական խումբը յունիսի 11-ից տասնօրեայ այցով գտնւում է Հայաստանում: Ինչպէս «ՆՈՅԵԱՆ ՏԱՊԱՆ»-ի թղթակցին յայտնեց ՀՕՖ-ի մամլոյ քարտուղար Լեւոն Լաճիկեանը, խումբը կայցելի Հայաստանի գեղատեսիլ վայրեր, Լեռնային Ղարաբաղ, ինչպէս նաեւ հանդիպումներ կունենայ Ամենայն Հայոց Գարեգին Բ կաթողիկոսի, ՀՀ արտաքին գործերի նախարար Վարդան Օսկանեանի հետ: Լ.Լաճիկեանը նշեց, որ արդէն 11-րդ տարին իրականացyող ծրագրի շրջանակում Հայաստան են այցելել ընդհանուր առմամբ 280 մասնագէտներ: Ըստ նրա, այս ծրագիրը նպատակ ունի նպաստել Սփիւռքի եւ Հայաստանի երիտասարդ հայ մասնագէտների կապերի ամրապնդմանը: Լ.Լաճիկեանի խօսքերով, այցելութիւնների ընթացքում սփիւռքահայ երիտասարդները ոչ միայն հաղորդակցւում են նախնեաց հողին, այլեւ հնարաւորութիւն ստանում տեղում կողմնորոշուել հայրենիքին գործնական օգնութիւն ցուցաբերելու հարցում:

---