ՄԵՔՍԻԿԱՅՈՒՄ ԵՎ ՖՐԱՆՍԻԱՅՈՒՄ ԱՆՆԱ ՄԱՅԻԼԵԱՆԸ ՆԵՐԿԱՅԱՑՐԵԼ Է ՀԱՅ
ՀՈԳԵՒՈՐ ԵՐԱԺՇՏՈՒԹԵԱՆ ԳՈՀԱՐՆԵՐԸ
13-06-2007 16:19:00 | Հայաստան | Մշակոյթ
ԵՐԵՎԱՆ, 13 ՅՈՒՆԻՍԻ, ՆՈՅԵԱՆ ՏԱՊԱՆ: Մայիսի 14-ից յունիսի 1-ը
երգչուհի Աննա Մայիլեանը մասնակցել է Մեքսիկայում կայացած «Օլին
կան» ամենամեայ փառատօնին, որտեղ նա ներկայացրել է հայ հոգեւոր
երաժշտութիւնը: «ՆՈՅԵԱՆ ՏԱՊԱՆ»-ի թղթակցի հետ զրոյցում երգչուհին
նշեց, որ իր համար կարեւոր է, որպէսզի աշխարհի տարբեր բեմերում հայ
հոգեւոր եւ ժողովրդական երաժշտութիւնը ներկայացուի անաղարտ, բայց
նորովի մեկնաբանութեամբ:
Յունիսի սկզբներին Ա.Մայիլեանը Հայաստանի տարուայ շրջանակներում
համերգներ է ունեցել ֆրանսիական երեք քաղաքներում: Առլ քաղաքի
Ազգային պատկերասրահում բացուած «Հնագոյն Հայաստան» ցուցահանդեսին
զուգահեռ Ա.Մայիլեանը ներկայացրել է հայ հոգեւոր երաժշտութեան
գոհարները: Իսկ Պերուժում երգչուհու համերգին մասնակցել է նաեւ
ֆրանսիական յայտնի «Դեբյուսի» քառեակը` կատարելով կոմիտասեան
ստեղծագործութիւններ:
Ա.Մայիլեանը ներկայումս համագործակցում է իտալական «Պրոմեթեո»
լարային քառեակի հետ: Վերջերս Երեւանում կազմակերպուած «Ազգային
պատկերասրահ» միջազգային երաժշտական փառատոնի շրջանակում երգչուհին
եւ քառեակի անդամները հանդէս են եկել կոմիտասեան կատարումներով: