ՀԱՅԱՍՏԱՆԻ ՖՈՒՏԲՈԼԻ ԱԶԳԱՅԻՆ ՀԱՒԱՔԱԿԱՆԸ «ԵՒՐՕ-2008»-Ի ԽՄԲԱՅԻՆ
ՄՐՑԱՇԱՐԻ ԾՐԱԳՐՈՎ 2:1 ՀԱՇՒՈՎ ՅԱՂԹԵՑ ՂԱԶԱԽՍՏԱՆԻ ԹԻՄԻՆ
04-06-2007 17:45:00 | | Սպորտ
ԱԼՄԱԹԻ, 4 ՅՈՒՆԻՍԻ, ՆՈՅԵԱՆ ՏԱՊԱՆ: Յունիսի 2-ին Ալմաթիում
«Եւրօ-2008»-ի առաջնութեան խմբային մրցաշարի ծրագրով Ղազախստանի
ֆուտբոլի ազգային հաւաքականը հիւրընկալել էր Հայաստանի ընտրանուն:
Հանդիպման 1-ին խաղակէսի 31-րդ րոպեին Ռոբերտ Արզումանյանը
բացեց հաշիւը: 8 րոպե անց 11 մետրանոց տուգանային հարուածով խաղի
հաշիւը կրկնապատկեց Հայաստանի թիմի աւագ Սարգիս Յովսէփեանը: 88-րդ
րոպեին տանտերերից Բալտիեւը կրճատեց հաշուի տարբերութիւնը:
Հայաստանի հաւաքականը յաղթեց 2:1 հաշւով:
Խմբի միւս հանդիպումներում գրանցուել են հետեւեալ
արդիւնքները. Ադրբեջան - Լեհաստան` 1:3, Բելգիա - Պորտուգալիա`
1:2 եւ Ֆինլանդիա - Սերբիա` 0:2:
Խմբային մրցաշարի առաջատարը Լեհաստանի հաւաքականն է` 19
միաւոր: 14-ական միաւոր են վաստակել Պորտուգալիայի եւ Սերբիայի
թիմերը: Հայաստանի եւ Ադրբեջանի ֆուտբոլիստներն ունեն 4-ական
միաւոր, բայց գնդակների տարբերութեամբ առջեւում է Հայաստանի
հաւաքականը:
Յունիսի 6-ին Հայաստանի ազգային հաւաքականը Երեւանում
կընդունի Լեհաստանի ընտրանուն: