Երեւանում իր աշխատանքները սկսեց «Ոսկէ ծիրան» կինոփառատօնը, որի բացման արարողութիւնը վարում էր ֆրանսահայ ռեժիսոր եւ դերասան Սերժ Աւեդիկեանը, որի բնորոշմամբ, «Ոսկէ ծիրանն» արդէն կայացել է: Վարչապետ Տիգրան Սարգսեանն իր ելոյթում համոզմունք յայտնեց, որ կազմակերպիչները «ամուր հիմք են դրել». «Ես հաւատում եմ փառատօնի ապագային»,- ասաց վարչապետը: Արարողութեան վերջում աշխարհահռչակ ֆրանսիացի դերասանուհի Ֆանի Արդանիին շնորհուեց Փարաջանովի անուան մրցանակը՝ կինոարուեստում ունեցած նուաճումների համար: Մրցանակը ֆրանսիացի դերասանուհուն յանձնեց իրանցի ճանաչուած ռեժիսոր Աբաս Քեարոստամին: Բացման արարողութեան աւարտին ցուցադրուեց Ա. Քեարոստամիի «Վաւերացուած պատճէններ» ֆիլմը:

---