ՀԱՅԱՍՏԱՆՈՒՄ ԴԵՂՈՐԱՅՔԱԿԱՅՈՒՆ ՀԻՒԱՆԴՆԵՐԻ ԱՆՎՃԱՐ ԲՈՒԺՄԱՆ
ԾՐԱԳԻՐԸ ԿՍԿՍՈՒԻ ԻՐԱԿԱՆԱՑՈՒԵԼ 2008 Թ.-ԻՑ
23-03-2007 19:00:00 | Հայաստան | Հասարակութիւն
ԵՐԵՎԱՆ, 23 ՄԱՐՏԻ, ՆՈՅԵԱՆ ՏԱՊԱՆ: Գերմանական KFW բանկի եւ
«GOPA-EPOS» կազմակերպութեան աջակցութեամբ Հայաստանում անցեալ
տարուանից իրականացւում է հետազօտութիւն` դեղորայքակայուն
տուբերկուլյոզով հիւանդների թուաքանակը ճշտելու նպատակով: Ինչպէս
«ՆՈՅԵԱՆ ՏԱՊԱՆ»-ի թղթակցին յայտնեց Տուբերկուլյոզի դէմ պայքարի
ազգային ծրագրի ղեկավարի տեղակալ Տաթեւ Կոստանեանը, հետազօտութեան
արդիւնքները կամփոփուեն մարտի վերջին: Սակայն, ըստ նրա, նախնական
տուեալների համաձայն, հանրապետութիւնում դեղորայքակայուն են անցեալ
տարի գրանցուած առաջնակի 1613 հիւանդների 8,5%-ը եւ կրկնակի 557
հիւանդների 35%-ը:
Տ.Կոստանեանը նշեց, որ 2008թ.-ից կիրականացուի այդ հիւանդների
անվճար բուժման ծրագիրը` առաջին անգամ Հայաստանում կիրառելով
միջազգային չափանիշներին համապատասխանող ԴՈԹՍ+ ռազմավարութիւնը:
Նախատեսւում է նաեւ դիմել «Կանաչ լոյս միջանցք» միջազգային
կազմակերպութեանը` բուժման համար անհրաժեշտ դեղորայքներն անհամեմատ
ցածր գներով ձեռք բերելու համար: Ըստ Տ.Կոստանեանի,
դեղորայքակայուն հիւանդների համար նախատեսուած դեղորայքները բաւական
թանկ են. մէկ հիւանդի բուժման համար ծախսւում է 10-12 հազար դոլար:
Տ.Կոստանեանը յայտնեց, որ մինչ այդ նախատեսւում է
դեղորայքակայուն հիւանդների բուժման համար նախատեսուած բաժանմունք
ստեղծել նաեւ Երեւանում գործող բուժհիմնարկներից մէկում: