ԲՆԱՊԱՀՊԱՆԱԿԱՆ ԱՌՈՒՄՈՎ ԵՐԵՒԱՆԻ ՎԱՏ ՕՐԻՆԱԿԸ ՏԱՐԱԾՒՈՒՄ Է
ՀԱՅԱՍՏԱՆԻ ՄԻՒՍ ՔԱՂԱՔԱՆԵՐՈՒՄ,- ԱՀԱԶԱՆԳՈՒՄ ԵՆ ԷԿՈԼՈԳՆԵՐԸ
15-03-2007 16:41:00 | Հայաստան | Հասարակութիւն
ԵՐԵՎԱՆ, 15 ՄԱՐՏԻ, ՆՈՅԵԱՆ ՏԱՊԱՆ: Երեւանում առկայ են
բնապահպանական լուրջ խնդիրներ. կառուցապատումն իրականացւում է
քաղաքաշինական եւ էկոլոգիական նորմերի լուրջ խախտումներով, կանաչ
տարածքների ոչնչացմամբ, ինչին զուգահեռ տարէցտարի աւելանում է
բնակչութեան եւ աւտոմեքենաների թուաքանակը: Այս մասին մարտի 15-ի
բնապահպանական հիմնախնդիրներին նուիրուած քննարկմանը նշեց «Յանուն
կայուն մարդկային զարգացման» ասոցիացիայի նախագահ Կարինէ
Դանիելեանը: Ըստ նրա, էկոլոգիական տեսանկիւնից մայրաքաղաքի առաւել
անբարենպաստ հատուածը Կենտրոնն է, ուր «մէկը միւսի վրայ բարձրայարկ
շէնքեր են կառուցւում` ի հաշիւ կանաչ տարածքների»: Էկոլոգների
կարծիքով, «մայրաքաղաքում կառուցւող էլիտար շէնքերը ապրելու համար
պիտանի չեն. այնտեղ կարելի է միայն զվարճանալու համար ընդամէնը մի
քանի օր անցկացնել»:
Կ.Դանիելեանը նշեց, որ շարունակւում է նաեւ կանաչ տարածքների
ոչնչացումը: «Ներկայումս բոլորիս աչքի առաջ յօշոտւում են Պուշկինի
անուան այգին, Սունդուկեանի անուան թատրոնի հարակից այգին, որի մէկ
երրորդը կառուցապատման տակ է դրուած»,- նշեց նա:
Ըստ նրա, Երեւանի «վատ» օրինակին արդէն հետեւում են Հայաստանի
միւս քաղաքներում: «Միայն Գիւմրին է, ուր կատարւում է շատ
ներդաշնակ կառուցապատում, ինչի արդիւնքում պահպանւում են եւ հին
մշակոյթային կառոյցները, եւ կանաչ տարածքները»,- ասաց
Կ.Դանիելեանը: