«SOS ԹԵՂՈՒՏ» ԲՆԱՊԱՀԱՊԱՆԱԿԱՆ ՀԱՍԱՐԱԿԱԿԱՆ
ԿԱԶՄԱԿԵՐՊՈՒԹԻՒՆՆԵՐԻ ԿՈԱԼԻՑԻԱՆ ԴԻՄԵԼ Է ՀՀ ՆԱԽԱԳԱՀԻՆ
01-03-2007 19:45:00 | Հայաստան | Հասարակութիւն
ԵՐԵՎԱՆ, 1 ՄԱՐՏԻ, ՆՈՅԵԱՆ ՏԱՊԱՆ: Բնապահպանական 26 հասարակական
կազմակերպութիւններ միաւորող «SOS Թեղուտ» կոալիցիան Թեղուտի
հանքավայրի նախատեսւող շահագործման դէմ գրաւոր բողոք է ներկայացրել
ՀՀ նախագահին: Ինչպէս մարտի 1-ի ասուլիսում նշեց «SOS Թեղուտ»
կոալիցիայի անդամ «Հայաստանի անտառներ» հասարակական
կազմակերպութեան ներկայացուցիչ Մհեր Շառոեանը, հանքավայրի
շահագործմամբ է'լ աւելի մեծ վնաս կհասցուի շրջակայ միջավայրին եւ
տեղի բնակչութեան առողջութեանը: Ըստ նրա, ծրագրի իրականացման
դէպքում կը խախտուեն մի շարք միջազգային կոնվեցիաներ, ՀՀ
Սահմանադրութիւնը եւ օրէնքները:
Մ.Շառոեանի խօսքերով, «Արմէնիան քափր փրոգրամ» (ACP)
ընկերութեան այդ ծրագրի պետական բնապահպանական փորձաքննության
ընթացքում ճիշտ չեն գնահատուել պետութեանը, բնակչութեանն ու շրջակայ
միջավայրին հասցւող իրական վնասները: Ըստ նրա, ծրագրի իրականացումը
յատկապէս աղէտալի հետեւանքներ կարող է ունենալ տեղի ջրահաւաք
աւազանի բնական հաւասարակշռութեան պահպանման առումով` զրկելով
տարածքի բնակավայրերը խմելու ջրից:
Բացի այդ, ինչպէս նշեց Թեղուտին հարակից Շնող գիւղի բնակիչ
Վառշամ Աւետեանը, ոչնչացման վտանգ է սպառնում տեղի
պատմամշակութային արժէքաւոր մի շարք յուշարձանների: «Մենք
մեղադրում ենք ուրիշներին հայկական պատմական յուշարձանները
ոչնչացնելու հարցում այն դէպքում, երբ ինքներս ենք նոյն կերպ
վարւում»,- ասաց նա:
Սոցիալ-էկոլոգիական ասոցիացիայի նախագահ Սրբուհի
Յարութիւնեյանը նշեց, որ հանքավայրը շահագործելու համար կհատվեն
լեռնային բարձրարժէք անտառներ, ինչի դիմաց ACP-ն տարեկան կը մուծի
ընդամէնը 8 մլն դոլարի չափով հարկեր, իսկ ընկերութեան բաժնետէրերը
կստանան 14 մլն դոլարի եկամուտ: «28 տարուայ ընթացքում ստանալով,
աւելի քան 406 մլն դոլարի մաքուր շահոյթ, ACP-ն այդտեղից կհեռանայ`
բնակչութեանը թողնելով խախտուած հողեր, լեռնային աղբիւրների
ցամաքած ակունքներ: Իսկ այդ ամէնը վերականգնելու համար կպահանջուեն մի
քանի սերունդների ջանքեր»,- ասաց Ս.Յարութիւնեյանը:
Ասուլիսին մասնակցում էին նաեւ Թեղուտի համայնքապետ
Յարութիւն Մելիքսեթեանը, Շնողի գիւղապետ Կորիւն Շադինյանը եւ
այդ գիւղերի մի խումբ բնակիչներ: Նրանք նշեցին, որ իրենք դէմ չեն
ծրագրի իրականացմանը, քանի որ տեղի բնակիչների գրեթէ կէսը
գործազուրկ է եւ «ընտանիքը կերակրելու ոչ մի միջոց չունի»: Իսկ
էկոլոգների այն ահազանգը, թէ Թեղուտը 30 տարի յետոյ վերածուելու է
մեռյալ գօտու, նրանց այս պահին այդքան էլ չի անհանգստացնում: «Եթէ
այսպէս շարունակուի, վաղ թէ ուշ Թեղուտը անմարդաբնակ կլինի»,- ասաց
Թեղուտի համայնքապետը: