«Հաբեր թյուրք» թերթն անդրադարձել է Կարագեոզեանի տարածքի
շինարարութեանը
12-01-2010 14:20:00 | | Հասարակութիւն
ՍՏԱՄԲՈՒԼ, 12 ՅՈՒՆՎԱՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Թուրքական «Հաբեր թյուրք» թերթն իր տնտեսական էջում անդրադարձել է
Կարագյոզյան հաստատութեան մերձակայ տարածքում կատարւող
շինարարութեանը: Ինչպէս հաղորդում է «Մարմարան», երբեմնի շուկայի
տարածքում կառուցւում է բարձրայարկ շէնք, որը հաւանաբար
հիւրանոցային համալիր կամ բնակելի շէնք է լինելու:
Թերթն արձագանքել է վարժարանի հիմնադիր Պետի Զիվերի այն
յայտարարութեանը, ըստ որի հաստատութիւնն իր տարածքը տուել է
կառուցւող հարկաբաժինների դիմաց: Թերթից տեղեկանում ենք, որ առաջին
անգամ է վագըֆների հողատարածութեան վրայ նման շինութիւն արտօնւում,
ինչը հնարաւոր է դարձել վագըֆների մասին նոր օրէնքի շնորհիւ:
Շինարարութիւնն իրագործում է Բերթուղբեյ հաստատութիւնը, որը
կառուցել է նաեւ Լոտուս բնակարանները Օրթագյուղի եկեղեցապատկան
հողերում: Ինչ վերաբերում է Կարագյոզյան հաստատութեան հողերին, ապա
այնտեղ շինարարութիւն իրականացնելու մեծ թւով թեկնածուներ են
եղել, այդ թւում` Գալթասարայի նախագահ Ադնան Փոլադը եւ Ֆեներբահչեի
նախագահ Ազիզ Յըլդըրըմը, գրում է «Մարմարան»: