ԵՐԵՎԱՆ, 22 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ: Հայաստանի
ժուռնալիստների միութիւնում կայացաւ հայ լաւագոյն
հրապարակախոսներին 1969 թուականից առ այսօր երեք տարին մէկ անգամ
շնորհվող «Ոսկէ գրիչ» մրցանակի յանձնման արարողութիւնը:
Այս տարի մրցանակին արժանացան Ստամբուլում լոյս տեսնող
«Մարմարա» օրաթերթի գլխաւոր խմբագիր, գրող, հրապարակախօս Ռոպեր
Հատտեճեանին եւ Երեւանում լոյս տեսնող «Ազգ» օրաթերթի
գլխաւոր խմբագիր, անուանի լրագրող Յակոբ Աւետիքեանը:
Նշուեց, որ այսուհետ ՀՀ Ժուռնալիստների Միութիւնը այս
հեղինակաւոր մրցանակը շնորհելու է ոչ միայն հանրապետութեան իր
գրչակից եղբայրներին, այլ նաեւ Սփիւռքի լրագրողներին` անկախ նրանց
բնակութեան եւ գործունէութեան վայրից: Ներկաները բարձր գնահատեցին
Սփիւռքի գործընկերներին պարգեւատրելու Հայաստանի ժուռնալիստների
միութեան որոշումը:
Երախտիքի եւ բարեմախթանքների խօսքով հանդէս եկան ժիւրիի
նախագահ, ՀՀ մշակոյթի նախարարի տեղակալ Դավիթ Մուրադեանը, ԵՊՀ
ժուռնալիստիկայի ֆակուլտետի դեկան Նաղաշ Մարտիրոսեանը եւ այլք:
Ինչպէս նշեց Դ.Մուրադեանը,
«Ոսկէ գրիչ»-ը ակադեմիական մրցանակ է եւ այն տրւում է լրագրության
ասպարէզում բազմամեայ վաստակ ունեցողներին, եւ դա է պատճառը, որ
մրցանակը չի շնորհուել երիտասարդ լրագրողներին:
Պատասխան խօսքում «Ազգ» օրաթերթի խմբագիր Հ.Աւետիքեանը
շնորհակալութիւն յայտնեց ժիւրիի անդամներին վստահութեան համար`
խոստովանելով, որ վերջին երեք տարիներին աւելի շատ զբաղուել է թերթի
խնդիրների կարգաւորմամբ` կառաւարմամբ, եւ բաւականին քիչ է գրել եւ
այս մրցանակը ընդունում է մի տեսակ «ավանսով»: