Հայաստանում գրանցուած է «խոզի գրիպի» 101 դէպք.
նախադպրոցական եւ հանրակրթական ուսհաստատություններում
դասընթացները չեն վերսկսւում
19-12-2009 12:30:00 | Հայաստան | Հասարակութիւն
ԵՐԵՎԱՆ, 19 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ-ՀԱՅԵՐՆ ԱՅՍՕՐ:
Դեկտեմբերի 19-ի դրութեամբ Հայաստանում գրանցուած է «խոզի գրիպի»`
AH1N1 հիւանդութեան 101 դէպք: Այս մասին «ՆՈՅԵԱՆ ՏԱՊԱՆ»-ի թղթակցին
յայտնեց ՀՀ առողջապահութեան նախարարի օգնական Շուշան Յունանեանը:
Նա միաժամանակ նշեց, որ ամէնօրեայ մոնիտորինգի արդիւնքների
համաձայն, հանրապետութիւնում սուր շնչառական հիւանդութիւնների
թուի նուազում է նկատւում:
Նոյն օրը յայտնի դարձաւ նաեւ, որ հիմք ընդունելով ՀՀ
առողջապահութեան նախարարի առաջարկը, ՀՀ կրթութեան եւ գիտութեան
նախարար Արմէն Աշոտեանը հրաման է ստորագրել` ընթացիկ տարուայ
դեկտեմբերի 21-28-ը ներառեալ Հայաստանի Հանրապետութիւնում գործող
նախադպրոցական եւ հանրակրթական ուսումնական հաստատութիւններում
(անկախ կազմակերպաիրաւական ձեւից) ուսումնական գործընթացը
դադարեցնելու վերաբերեալ:
Ըստ ԿԳՆ-ի պաշտօնական կայքէջի հաղորդագրութեան, հանրակրթական
ուսումնական հաստատութիւններում առաջին կիսամեակի գնահատականները
կամփոփուեն յունուար ամսին: