Տիգրան Եկավյանը Բեյրութում խօսել է ֆրանսահայ մամուլի մասին
18-12-2009 17:30:00 | | Հասարակութիւն
ԲԵՅՐՈՒԹ, 18 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ: «Ֆրանս
Արմէնի» թերթի խմբագրակազմի անդամ եւ քաղաքագէտ Տիգրան Եկավյանը
դեկտեմբերի 17-ին «Ազդակ» թերթի կազմակերպած հանդիպմանը հանդէս է
եկել «Ֆրանսիական մամուլը» զեկուցումով: Տիգրան Եկավյանն
անդրադարձել է Ֆրանսիայում լոյս տեսած եւ լոյս տեսնող թերթերին:
Նա նշել է, որ Ֆրանսիայում գոյութիւն ունի երկու տեսակի մամուլ`
հայասեր եւ հայկական: Հայասեր մամուլը, նրա խօսքերով, ֆրանսերենով
լոյս տեսնող մամուլն է, որտեղ բացակայում է ազգային շունչն ու
քաղաքական մտածողութիւնը: Յետոյ աւելացրել է, որ այլ տեսանկիւնից
հայատառ մամուլը օրըստօրէ նահանջում է, ինչը շատ մտահոգիչ երեւոյթ
է:
Անդրադառնալով «Յառաջ» օրաթերթի փակման պատճառներին, Եկավյանը
նշել է, որ թերթը փակուել է, քանի որ այն կղզիացել էր ու հրաժարուել
արդիականացվելուց: Իսկ «Նոր Յառաջի» մասին նա նշել է, որ թերթը
դեռեւս առաջին քայլերն է անում, դեռ չկան վերլուծական յօդուածներ,
քանի որ թերթը չունի փորձառու հոդվածագիրներ: Նա հոյս է յայտնել,
որ առաջիկայում այդ առումով նուաճումներ կարձանագրուեն:
Անդրադառնալով «Ֆրանս Արմէնի» եւ «Նուվել դ'Արմէնի» թերթերին,
Տիգրան Եկավյանը նշել է, որ «Ֆրանս Արմէնին» ծրագրում է համացանցի
միջոցով առաջիկայում դառնալ սփիւռքահայ մի թերթ` բազմաբնոյթ
նիւթերով ու տարբեր հարցերի քննարկումներով: Զեկուցողը նաեւ
անդրադարձել է «Նուվել դ'Արմէնի» թերթի հայերէն բաժնում
մտաւորականների բացակայութեանը, որը որակի հետ կապուած խնդիրներ է
ստեղծում: Ելոյթի վերջում Տիգրան Եկավյանը պատասխանել է ներկաների
հարցերին: