Բուլղարիայի Վելիկո Տրնովո քաղաքում հայկական եկեղեցի է
յայտնաբերուել
16-12-2009 18:25:00 | | Մշակոյթ
ՎԵԼԻԿՈ ՏՐՆՈՎՈ, 16 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Բուլղարական պատմական աղբիւրների վկայութեամբ, Բուլղարիայի Վելիկո
Տրնովո քաղաքի հիւսիսային մասում գտնուող «Նիկոլա Պիկոլո» փողոցում
գործել է հայկական եկեղեցի: Այն հիմնադրուել է որպէս կաթոլիկ
եկեղեցի` առեւտրական Պավլո Բոժիկովիչի հովանաւորութեամբ, ինչպէս
յիշատակուած է 1588 թ. դեկտեմբերի 12-ի փաստաթղթերում: Աւելի ուշ
տարածքը գնուել է հայերի կողմից, եւ այնտեղ հայկական եկեղեցի է
կառուցուել: Այդ մասին են վկայում 1625 թ. եկեղեցու վերանորոգման եւ
վերակառուցման փաստաթղթերը: Այդ շրջանում հայերին թույլատրվել է
եկեղեցական արարողութիւններ կատարել, իսկ 17-րդ դարի վերջին այն
հանդիսացել է հայ համայնքի սեփականութիւնը: Աւարտելով եկեղեցու
վերանորոգումը` հայերն այն անուանել են «Սուրբ Աստուածածին»: Քանի որ
եկեղեցին կառուցոուած է եղել հիմնականում փայտից, տարիների ընթացքում
սկսել է փլուզվել, իսկ վերանորոգման համար համապատասխան միջոցներ
չեն եղել:
1989 թ. աւերուած հուշարձան-եկեղեցու մնացորդները փրկելու
նպատակով Վելիկո Տրնովո քաղաքի պատմութեան թանգարանին յանձնարարուել
է հնագիտական պեղումներ կատարել: Պեղումների մասին Կյուստենդիլում
1990 թ. հրապարակուել է «Հնագիտական յայտնագործում 1989 թուականի
պեղումներից» յօդուածը, որտեղ առաջին անգամ յիշատակուել է այդ
բնակավայրում հայ առաքելական եկեղեցու գոյութեան փաստը:
2009 թուականի ապրիլի 1-3-ը սկսուել են յուշարձանի
«Կաթոլիկությունը եւ հայկական եկեղեցին» խորագրով հնագիտական
«փրկարարական» պեղումները` դոցենտ Խիտկո Ստեֆանով Բաչեւի եւ Իլիյան
Պետրով Պետրակիեւի գլխաւորութեամբ: Պեղումների համար յատկացուել է
272 քմ տարածք: Կտարված հետազոտական աշխատանքների արդիւնքում
պարզուել է, որ այդ վայրում տեղակայուած է եղել երկու հուշարձան`
կաթոլիկ եւ հայ առաքելական եկեղեցու մնացորդներով, ընդ որում
երկրորդը կառուցոուած է եղել առաջինի բեկորների, գերեզմանների,
պատմական արժէք ներկայացնող մասունքների վրայ: Երկշերտ յուշարձանի
վերին շերտում յայտնաբերուել են նաեւ հայկական տառերով քարաբեկորներ
եւ զարդաքանդակներ, որոնք եւս հաստատում են 17-րդ դարից մինչեւ
20-րդ դարը հայկական եկեղեցու գոյութեան փաստը:
Այժմ Բուլղարական Հանրապետութեան մշակոյթի նախարարութեան եւ
յուշարձանների պահպանությամբ զբաղուող համապատասխան մարմինների
կողմից քայլեր են ձեռնարկւում եկեղեցին որպէս բուլղարական
պատմամշակութային արժէք ճանաչելու եւ գրանցելու ուղղութեամբ: