Մոսկուայի փոխքաղաքապետը այցելել է կառուցւող հայկական Մայր
տաճար
16-12-2009 16:05:00 | Ռուսաստան | Հասարակութիւն
ՄՈՍԿՈՒԱ, 16 ԴԵԿՏԵՄԲԵՐԻ, ՆՈՅԵԱՆ ՏԱՊԱՆ - ՀԱՅԵՐՆ ԱՅՍՕՐ:
Դեկտեմբերի 11-ին Մոսկուայի փոխքաղաքապետ Ս.Լ.Բայդակովը այցելել է
Մոսկուայում կառուցւող Հայ առաքելական եկեղեցու մայր տաճար եւ Եզրաս
եպիսկոպոսին յանձնել քաղաքագլուխ Յու.Մ.Լուժկովի շնորհակալագիրը:
Ինչպէս հաղորդում է Ռուսաստանի հայերի «Երկրամաս» թերթը, Հայ
առաքելական եկեղեցին Մոսկուայում գործում է հարյուրամյակներով: Հայ
համայնքի ներկայացուցիչները ակտիւօրէն զբաղւում էին առեւտրով եւ
հաստատւում առեւտրական ուղիների մօտ: Այդ մասին յիշողութիւն են
մնացել Հայկական նրբանցք, Հայկական գերեզմանատուն անուանումները,
որտեղ գտնւում է ամենահին մոսկովեան հայկական եկեղեցին` Սուրբ
Յարութիւնը:
Մոսկուայի կառավարութիւնը նպաստել է Սուրբ Գեւորգի մատուռի
շինարարութեանը եւ սատարել Սուրբ Խաչ մայր տաճարի համալիրի
կառուցմանը, որը ամենախոշոր եկեղեցական համալիրն է
Հայաստանից դուրս: 2008 թ. յունուարին հրապարակուեց Մոսկուայի
կառավարութեան որոշումը «Տաճարի եւ Հայ առաքելական
եկեղեցու Ռուսաստանի եւ Նոր Նախիջեւանի թեմի առաջնորդի`
կաթողիկոսական տեղապահի նստավայրի շինարարութեան մասին», որը սկիզբ
դրեց բազմագործառույթ համալիրի շինարարական ակտիւ աշխատանքներին,
որի մէջ մտնում են մայր տաճարը, մատուռ, լուսավորական կենտրոն`
գրադարանով, նիստերի դահլիճով, թանգարանով, նստավայրով,
սեղանատնով, հյուրատնով եւ ստորգետնեայ ավտոկայանատեղով
ժամասացությունների ժամանակ հաւատացեալների մեքենաների տեղավորման
համար:
Այս համալիրը, որ գտնւում է Տրիֆոնովսկայա փողոցում, կլինի
Մոսկուայի հայ համայնքի կրոնական, մշակոյթային եւ սոցիալական կեանքի
կենտրոնը, որն այսօր էլ զարգանում է տարբեր վայրերում: Համայնքի
տարատեսակ գործունէութեան կենտրոնացումը մէկ վայրում թոյլ կտայ այն
բարձրացնել նոր մակարդակի: Համալիրում կգործեն բարեգործական
բժշկական ծառայութիւն եւ ճաշարան, կհաւաքուեն պատերազմի եւ
աշխատանքի վետերանները, ակումբներ ըստ հետաքրքրութիւնների,
երիտասարդական ընկերակցություն: Համալիրի դահլիճներում կանցկացուեն
համերգներ, ցուցահանդեսներ, դասախօսութիւններ: Թեմի նախնական
գնահատմամբ համալիրի բազմաբնոյթ աշխատանքներում կներգրաւուեն մօտ
200 հազար մոսկուացիներ:
Ներկայումս համալիրում գործնականում աւարտուած են
շինմոնտաժային աշխատանքները, կատարւում է շէնքերի արտաքին եւ
ներքին հարդարում, լրիւ աւարտուած է մատուռի շինարարութիւնը, որի
վրայ տեղադրուել է խաչը: Համալիրի կառուցումը ծրագրւում է աւարտել
2011 թուականին:
Մոսկուայի կառավարութեան եւ հայկական եկեղեցու
համագործակցութիւնը նոր եկեղեցիների կառուցման գոծոմւ միայն այս
նախագծով չի սահմանափակւում: Ներկայումս պատրաստւում է կարգադրական
փաստաթուղթ Պոկլոննայա գորայի Յաղթանակի այգու համալիրում Հայ
առաքելական եկեղեցու հուշաժամատան շինարարութեան մասին: